Беларуская мабільная праграма для экалагічных падарожжаў трапіла ў топ-3 у Google Play
Мабільная праграма BY Guide, распрацаваная стартапам Парку высокіх тэхналогій, увайшла ў топ-3 рэйтынгу Google Play у катэгорыі «Падарожжы». Пра гэта піша Office Life са спасылкай на прэс-службу ПВТ.
Мабільная праграма BY Guide прызначана для экалагічных падарожжаў па Беларусі. У ёй сабраны спіс маршрутаў з апісаннем і фатаграфіямі славутасцяў, якія можна ўбачыць па дарозе. Усталяваны і GPS-трэкер, які дапаможа падарожнікам арыентавацца на мясцовасці.
У праграмы ўжо больш за 7 тыс. карыстальнікаў. Зараз у ёй даступна 85 эколага-турыстычных маршрутаў, запланавана да размяшчэння яшчэ больш за 300 экасцежак і веламаршрутаў па ўсіх рэгіёнах краіны. Дарэчы, кожны новы маршрут у сэрвіс дадаюць толькі пасля таго, як каманда стартапа сама пратэстуе турыстычны аб'ект.
Асаблівасці сэрвісу — навігацыя без доступу ў інтэрнэт і падзел маршрутаў па відах для розных катэгорый падарожнікаў, напрыклад, людзей з парушэннем зроку ці сем'яў з дзецьмі і жывёламі.
Цяпер у планах у BY Guide — стварыць версію для iOS, а таксама запусціць аўдыягіды да розных славутасцяў.
Каментары