У Гомелі асудзілі жанчыну, якая выклала ў тыктоку відэа інцыдэнту з супрацоўнікам ДАІ і сваёй дачкой
У Гомельскім абласным судзе 8 снежня паводле ч. 1 арт. 130 Крымінальнага кодэкса (распальванне іншай сацыяльнай варожасці) асудзілі 40-гадовую палітзняволеную Сняжану Цадаву. Яе судзілі за відэа ў тыктоку інцыдэнту на Лоеўшчыне, дзе яна каментавала дзеянні супрацоўніка ДАІ, які аштрафаваў яе дачку за адсутнасць флікера.
Як піша «Гомельская вясна», суддзя Алег Харошка прызначыў жанчыне шэсць месяцаў калоніі ва ўмовах агульнага рэжыму — іх яна ўжо адбыла ў следчым ізалятары.
Інцыдэнт на Лоеўшчыне, у выніку якога судзілі палітзняволеную, здарыўся ў сярэдзіне ліпеня. Тады ў вёсцы Бывалькі пад Лоевам дзяўчыну інспектар аштрафаваў за адсутнасць флікера — яна ішла па абочыне. Яе маці — Сняжана Цадава — зняла на камеру дзеянні супрацоўніка ДАІ са сваімі каментарамі і выклала ў тыктоку.
Як пісалі ва УУС Гомельскага аблвыканкама, «праваахоўнік запрасіў дзяўчыну ў службовы аўтамабіль для складання адміністрацыйнага пратакола за правапарушэнне». У сваім відэа маці кажа, што яе дачку не выпускаюць з машыны. Таксама супрацоўнік не аддаваў тэлефона адной з сябровак дзяўчыны.
Паводле версіі абвінавачвання, маці дзяўчыны «ўсяляк спрабавала перашкаджаць вядзенню адміністрацыйнага працэсу, здымала тое, што адбываецца, на тэлефон, эмацыйна каментуючы дзеянні супрацоўніка міліцыі і даючы ацэнку дзеянням праваахоўнікаў у цэлым».
У выніку пры канцы жніўня супрацоўнікі АМАПа затрымалі жанчыну дома з ужываннем сілы. Да Цадавай дадому прыехала следча-аператыўная група. Пасля распачалі крымінальную справу аб распальванні варожасці або варожасці ў дачыненні да міліцыі паводле арт. 130 Крымінальнага кодэкса (распальванне іншай сацыяльнай варожасці). Да суда яе змясцілі пад варту ў СІЗА.
Чалы: Чым даўжэй Лукашэнка марудзіць з выбарамі, тым больш аргументаў, каб яму не ісці1
Каментары