Рарытэтны аўтамабіль коштам 610 тысяч рублёў спрабавалі вывезці з Беларусі
Па экспертызу звярнуліся нават у Мінкульт.
Рарытэтнае аўто 1947 года выпуску спрабавалі вывезці з Беларусі без неабходных дакументаў. Незаконны вываз транспартнага сродку, які з'яўляецца культурнай каштоўнасцю, выявілі гродзенскія мытнікі ў пункце пропуску «Каменны Лог», паведамляе прэс-служба беларускай мытні.
На такім легкавым аўтамабілі маркі «ЗІС 110» ехаў у Літву грамадзянін Расіі. Выбраўшы «зялёны калідор», кіроўца пацвердзіў тое, што тавары, якія падлягаюць абавязковаму дэклараванню, у яго адсутнічаюць.
Пры правядзенні мытнага кантролю супрацоўнікі мытні звярнулі ўвагу на дату выпуску аўто, указаную ў тэхнічным пашпарце.
Машына была выпушчана ў 1947 годзе, а транспартныя сродкі, вырабленыя да 1 студзеня 1951 года, адносяцца да катэгорыі культурных каштоўнасцей. Таму іх трэба дэклараваць.
Тое, што транспартны сродак адносіцца да катэгорыі культурных каштоўнасцяў, пацвердзілі і ў Мінкульце
Кошт незадэклараванага рарытэтнага аўто склаў каля 610 тысяч рублёў.
У дачыненні да грамадзяніна Расіі распачаты адміністрацыйны працэс у адпаведнасці з ч. 4 арт. 15.5 КаАП (недэклараванне альбо наданне недакладных звестак аб таварах). Санкцыяй артыкула прадугледжаны штраф да 30% ад кошту незадэклараванага тавару.
Цяпер чытаюць
Лукашэнка: Што творыцца ў краіне, у нас усе гэтую гусь круцяць33
Каментары