Прадстаўнік Харкаўскай абласной пракуратуры Дзмітрый Чубенка сцвярджае, што абломкі адной з ракет, якія прыляцелі ў Харкаў 2 студзеня, не падобныя на абломкі ракет, якія ўжываліся Расеяй раней, што можа паказваць на яе паўночнакарэйскае паходжанне.
Пра тое, што Паўночная Карэя паставіла Расеі нейкую колькасць балістычных ракет, у чацвер заявілі ўрады ЗША, Вялікабрытаніі і Паўднёвай Карэі. Кіеў праз некаторы час пацвердзіў, што ў першыя дні студзеня Расея сапраўды ўжывала раней не знаёмыя ўкраінскай арміі ракеты.
Чубенка паказаў журналістам абломкі ракеты і апісаў іх асаблівасці так: «Метад вытворчасці не вельмі сучасны. Ёсць адхіленні ад стандартных ракет «Іскандэр», якія мы раней бачылі пры ўдарах па Харкаву. Гэтая ракета падобная на адну з паўночнакарэйскіх ракет».
Паводле яго слоў, ад «Іскандэра» яна адрозніваецца крыху большым дыяметрам і формай хваставой часткі.
Чубенка таксама адзначыў, што раней не фіксаваліся выпадкі, каб расейцы спрабавалі схаваць маркіроўку ракет.
«Спроба зацерці нумары на пэўных дэталях сведчыць аб жаданні схаваць інфармацыю аб гэтай ракеце. Да таго ж па ўнутраным абсталяванні мы бачым: надпісы ўнутры не вельмі акуратныя, зробленыя ўразнабой. Звычайна ў такіх ракетах, зробленых і ў Савецкім Саюзе, і ўжо ў Расеі, надпісы вельмі акуратныя, усё зроблена вельмі старанна, часам ставяцца нават прозвішчы работнікаў завода, каб усталяваць адказных — хто менавіта і што рабіў. Тут жа такога няма. І тыя надпісы, лічбы, абрэвіятуры, якія ёсць, яны разнатыпныя», — распавёў Чубенка.
«Менавіта таму мы схіляемся да версіі, што гэта можа быць ракета, пастаўленая Паўночнай Карэяй», — дадаў чыноўнік.
Цяпер чытаюць
Дзядок расказаў, як паводзіў бы сябе ў сённяшняй Беларусі і што будзе далей3
Каментары