ГУБАЗіК рассылае былым палітвязням і іх сваякам папярэджанні з патрабаваннем адпісацца ад «экстрэмісцкіх рэсурсаў»
Некаторыя былыя палітвязні ды іх сваякі паведамляюць, што пачалі атрымліваць у тэлеграме папярэджанні адпісацца ад чата «Світанак», піша «Радыё Свабода».
Змест паведамлення такі:
«Вы дэананімізаваныя як удзельнік дэструктыўнага рэсурсу «Світанак». Каб пазбегнуць прыцягнення да ўстаноўленай законам адказнасці, вам неабходна пакінуць згаданы тэлеграм-чат на працягу гадзіны. Таксама рэкамендуем адпісацца ад іншых экстрэмісцкіх інтэрнэт-рэсурсаў! Час пайшоў».
Па ўсёй Беларусі з 23 студзеня супрацоўнікі КДБ рабілі масавыя ператрусы, допыты і затрыманні сваякоў і блізкіх палітвязняў, а таксама былых палітзняволеных, якія нядаўна выйшлі на волю і заставаліся ў Беларусі.
Паводле праваабаронцаў «Вясны», агулам за апошнія дні пад пераслед трапілі сама меней 165 чалавек. Пасля ператрусаў людзей забіралі на допыты, а потым адпускалі з падпіскай аб неразгалошванні. Супраць часткі затрыманых завялі крымінальныя справы паводле арт. 361-1 («удзел у экстрэмісцкім фармаванні») і арт. 361-4 («садзейнічанне экстрэмісцкай дзейнасці»).
Некаторых затрыманых судзяць па адміністрацыйных справах. Вялікая частка людзей выходзіць на волю пасля допытаў, але ў якім статусе, невядома, адзначаюць праваабаронцы.
Цяпер чытаюць
У міліцэйскім конкурсе прыгажосці перамагла амапаўка, якая ў 2020 годе разганяла пратэсты34
Каментары