Былому прэм'еру Пакістана і ягонай жонцы далі па 7 гадоў зняволення за тое, што надта хутка пажаніліся
Суд у Равалпіндзі прысудзіў былога прэм'ер-міністра Пакістана Імрана Хана і яго жонку Бушру Бібі да сямі гадоў пазбаўлення волі за хуткае вяселле пасля разводу. Для Хана гэта ўжо трэці прысуд, вынесены цягам тыдня, піша «Настоящее время».
Суд пастанавіў, што Хан і Бібі парушылі ўстаноўленую ў Каране забарону жанчынам выходзіць замуж адразу пасля разводу.
Бібі развялася ў лістападзе 2017 года і павінна была вычакаць тры месяцы, перш чым уступіць у шлюб зноў, — у ісламе гэты перыяд называецца Ідай. А яна выйшла замуж за Хана ўжо ў лютым 2018 года.
У дачыненні да Хана заведзена больш за 50 крымінальных спраў, уключаючы тэрарызм. У жніўні 2023 года яго прысудзілі да трох гадоў пазбаўлення волі па абвінавачванні ў адмыванні грошай.
30 студзеня 2023 года Хан і і экс-кіраўнік МЗС Пакістана Шах Мехмуда Курашы атрымалі 10 гадоў турэмнага зняволення па абвінавачванні ў парушэнні закона аб дзяржтаямніцы. На наступны дзень суд прысудзіў былога міністра і ягоную жонку да 14 гадоў турмы па справе аб карупцыі.
Таксама Хану і ягонай жонцы Бібі забаранілі займаць дзяржаўныя пасады цягам 10 гадоў і прызначылі штраф на суму 787 млн рупій (9,4 млн даляраў) кожнаму.
Апошнія прысуды вынеслі за некалькі дзён да ўсеагульных выбараў, прызначаных на 8 лютага. У іх бярэ ўдзел партыя Хана «Рух за справядлівасць». Вынесены прысуд не дазволіць самому Хану браць удзел у выбарах на працягу наступных пяці гадоў.
Цяпер чытаюць
Сын Пяткевіч вярнуўся з ЗША, каб заняцца кансультацыямі па крыптавалюце. І заадно падпрацаваць стажорам у БДУ3
Каментары