Днямі праўладныя прапагандысты накінуліся на крамы «Міла» за рэкламу з былым тэлевядучым Яўгенам Перліным, які пакінуў дзяржаўнае тэлебачанне ў 2020 годзе. У выніку рэкламу прыбралі. Перлін у адказ апублікаваў пост у інстаграме, у якім расказаў, як любіць Мінск, Беларусь, беларусаў, што нікому не здраджваў. Мімаходзь ён згадаў пра свае праекты на тэлебачанні, і гэта раз'юшыла былых працадаўцаў.
У тэлеграм-канале Агенцтва тэлевізійных навін БТ з'явіўся разгромны пост, у якім, як сцвярджаецца, прапагандысты «не змаглі ўжо маўчаць і спяшаюцца паведаміць», што праца Перліна на тэлебачанні была нібыта нічога не вартай.
Такая нервовая рэакцыя стала адказам усяго на адну перлінскую фразу: «Столькі праектаў мы запусцілі, столькі прыгажосці паказалі ў вячэрнім шоу на ТБ, у рамках Еўрабачання і розных спартыўных турніраў».
Былыя калегі сцвярджаюць, што шоу Перліна «Макаёнка, 9» было адным з найбольш правальных праектаў канала «Беларусь 1»: «сярэдняя доля — у раёне 2-2,5% пры цяперашняй долі тэлеканала 8-9%». Яго ўжо быццам збіраліся пераносіць на нязручны начны час, а пасля ўвогуле закрыць.
У супрацьлегласць перлінскай праграме расхвальваецца праект «Фактор.ВУ», які, паводле прапагандыстаў, «меў сярэднюю долю аднаго эфіру ў трэцім сезоне ў раёне 21-22%. Самы рэйтынгавы эфір — у раёне 28%. На піку тэлеглядзення — больш за 40%».
Мяркуючы па лічбах апошняга тэлевымярэння, ганарыцца «Беларусь 1» няма чым. У топе праграм быў толькі адзін з выпускаў «Фактор.ВУ» з рэйтынгам 4,81%.
Чытайце: «Даярка з Хацапетаўкі» абагнала Эйсманта. Што найбольш глядзелі на ТБ у студзені?
Акрамя таго, у допісе АТН сцвярджаецца, што Перлін «да стварэння «Еўрабачання» ніколі не меў ніякага дачынення. Да вядзення —так. Але яно не мае ніякага дачынення да стварэння».
Што маецца тут на ўвазе пад стварэннем «Еўрабачання», не ўдакладняецца. Як вядома, гэты праект не беларускі, а створаны яшчэ ў 1956 годзе, задоўга да нараджэння Яўгена Перліна і, відаць, таксама ягоных крытыкаў.
Цяпер Яўген Перлін зарабляе на жыццё тым, што вядзе вяселлі і карпаратывы.
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку9
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары