У Гродзенскім гарвыканкаме расказалі, чаму знеслі казарму XIX стагоддзя
Ва ўпраўленні будаўніцтва, архітэктуры і горадабудаўніцтва Гродзенскага гарвыканкама расказалі, чаму вырашылі знесці аўтэнтычную казарму XIX стагоддзя на вуліцы Шчорса, хаця спачатку абяцалі захаваць. Маўляў, на цокальным паверсе будынка хацелі пабудаваць гаражы, але аказалася, што сцены не вытрымаюць, піша Hrodna Life.
Першапачаткова забудоўшчык распрацаваў праект з захаваннем гістарычнага будынка казармы на Шчорса, 2. Праект прадугледжваў рэканструкцыю будынка пад шматкватэрны жылы дом і ўладкаванне гаражоў у цокальным паверсе. Але ўжо на стадыі падрыхтоўчых работ выявілі неадпаведнасць апорнай здольнасці сценаў будынка нарматывам, патлумачылі ў гарвыканкаме для «Гродно Плюс».
Тое, што цэгла страціла свае ўласцівасці, пацвердзіла атэставаная на правядзенне абследаванняў кампанія. Праз гэта нельга было гарантаваць бяспеку рэканструяванага аб’екта — і без таго слабыя канструкцыі дадаткова нагружаліся.
Знясуць і пабудуюць
Забудоўшчык ААТ «Палессежылбуд» прыступіў да рэалізацыі праекта рэканструкцыі былой казармы на Шчорса, 2. Новае праектнае рашэнне прадугледжвае частковы дэмантаж неналежных апорных канструкцый. Пасля гэтага збіраюцца ўзвесці будынак з захаваннем габарытаў і характару архітэктуры наяўнага будынка.
«Больш таго, матэрыялы захоўваюцца ад разборкі будынка, у прыватнасці цэгла, які пройдзе дбайную праверку па марозаўстойлівасці і апорнай здольнасці, будуць прымяняцца ў аздабленні аб’екта, які будуецца», — заявілі чыноўнікі.
Праект прайшоў усе ўзгадненні, запэўніваюць у гарвыканкаме. Ён быў распрацаваны ў адпаведнасці з архітэктурна-планіровачным заданнем і заданнем на праектаванне, ва ўстаноўленым парадку былі пройдзеныя ўсе неабходныя адміністрацыйныя працэдуры. У тым ліку аб’ект двойчы разглядаўся на архітэктурна-горадабудаўнічай радзе горада. Было атрымана ўзгадненне гарадскога і абласнога камітэта архітэктуры і будаўніцтва і станоўчае заключэнне Дзяржбудэкспертызы па Гродзенскай вобласці.
Ці знясуць такім самым чынам другую казарму комплексу XIX стагоддзя па Шчорса, 4, у гарвыканкаме не ўдакладнілі.
Цяпер чытаюць
Фядута рэзка адказаў Калеснікавай: За што вы змагаліся ў 2020 годзе, не цікавіць нікога, акрамя мядзведзяў з берлінскага заапарка, якія вас атачаюць4949
Каментары