Былы палітвязень Зміцер Фурманаў адкрывае ў Вільні краму і творчую прастору
Гродзенцы Зміцер і Вольга Фурманавы адкрываюць у цэнтры Вільні краму і творчую прастору Kropka, піша Hrodna.life. Там будуць прадаваць рамесныя вырабы і праводзіць майстар-класы і выставы. На першы бізнэс пару натхніла чаканне дзіцяці.
Зміцер і Вольга Фурманавы. Крыніца: асабістая старонка Вольгі ў Facebook
Крама знаходзіцца ў старым горадзе па адрасе вуліца Savičiaus, 6. У новай беларускай краме ў Вільні сужэнцы будуць прадаваць вырабы рамеснікаў і тавары з беларускай і літоўскай сімволікай. У другім пакоі крамы яны плануюць рабіць майстар-класы, выставы, прэзентацыі, прагляды фільмаў ды іншыя імпрэзы. Зараз пара кліча майстроў і рамеснікаў да супрацоўніцтва.
Сярод розных варыянтаў назвы для крамы абралі Kropka — бо крама і творчая прастора ў адным месцы мусіць стаць кропкай збору розных людзей па розных інтарэсах. «Будзе здорава, калі такія прасторы, якія збіраюць беларусаў, будуць па ўсім свеце», — кажа Вольга Фурманава.
На першы бізнэс натхніла цяжарнасць
На стварэнне крамы Вольгу Фурманаву натхніла… цяжарнасць. «Я пачала задумвацца, што будзе пасля нараджэння дзіцяці, як мы будзем далей жыць, бо невядома, ці будуць нейкія выплаты па цяжарнасці. І вось тры месяцы таму, прачнуўшыся ранкам, сказала мужу, што хачу сваю краму. Муж мяне падтрымаў, і з таго дня кожны дзень марыла пра гэта, запісвала ідэі», — расказала Вольга.
Апошнія дзесяць гадоў усе яе працы былі звязаныя з продажам, але ўласны бізнэс — гэта новае і для яе, і для Змітра. Яны рыхтаваліся: думалі, што патрэбна, каб адчыніць краму, запісаліся на курсы прадпрымальніцтва, знайшлі, як аформіць фірму, арандавалі памяшканне, зрабілі рамонт, а зараз устанаўліваюць мэблю. Адкрыццё плануецца ўжо неўзабаве.
Хто такія Вольга і Зміцер Фурманавы?
Зміцер Фурманаў — палітвязень, якога асудзілі па «справе Ціханоўскага». Яго затрымалі ў канцы траўня 2020 года на пікеце па збору подпісаў за Святлану Ціханоўскую і вынеслі разам з крэслам, на якім ён сядзеў. Фурманава абвінавацілі па ч.1 арт. 342 КК «Удзел у групавых дзеяннях, якія груба парушаюць грамадскі парадак». Паводле пракурора, ён дапамагаў шукаць Ціханоўскаму саўдзельнікаў за ўзнагароду.
Фурманаву прысудзілі 2 гады зняволення і накіравалі ў папраўчую калонію № 3 у гарадскім пасёлку Віцьба. Амаль увесь час у калоніі ён правёў у карцары. 21 кастрычніка 2021 ён выйшаў на свабоду з калоніі і ў той жа дзень пакінуў Беларусь. 30 кастрычніка 2021 года пасля Кіева ён прыехаў у Вільню і сустрэўся з Вольгай. Увесь час зняволення Вольга, на той час дзяўчына Змітра, чакала яго. Яна нават трымала галадоўку каля СІЗА ў Мінску на знак пратэсту супраць яго незаконнага затрымання і пазней у Вільні, калі трымаў галадоўку Зміцер. Ужо за мяжой пара пабралася шлюбам.
Разведка ЗША: Беларусь стала перадавым вайсковым плацдармам Расіі24
Каментары