У Беларусі пасадзілі вагнераўца, які ваяваў за Расію. Гэта восьмая судзімасць хранічнага алкаголіка
Дзякуючы праекту Digital Intelligence Team атрымалася даведацца болей пра біяграфію Яўгена Комара.
Яўгену Комару 44 гады, родам ён з сяла Шолахава Дняпроўскай вобласці Украіны. Праўда, амаль усё жыццё пражыў у Беларусі і мае беларускае грамадзянства. Не жанаты, дзяцей няма. Жыў у вёсцы Рудск Іванаўскага раёна.
Комар не вёў сацсетак, але ягоны пакручасты лёс апісаны ў судовых пастановах.
Мужчына ўпершыню атрымаў крыміналку ў 2001-м годзе. Тады ён п'яны пабіўся з жыхаром вёскі Рудск каля мясцовага дома культуры. За гэта яму далі паўгода арышту.
Праз паўгода Комар зноўку сеў за крадзеж. У сакавіку 2002-га ён нападпітку залез у краму «праз вакенца прыняцця хлеба» і скраў адтуль «матэрыяльныя каштоўнасці» — звычайна ў такіх выпадках крадуць закуску і алкаголь. Суд прысудзіў яму два з паловай гады калоніі. Год знялі па амністыі.
Праз тры месяцы Комар сп'яну двойчы ўдарыў нажом вяскоўца. За гэта 10 студзеня 2004 года Комару прысудзілі пяць гадоў калоніі, пасля дадалі тэрмін за «непадпарадкаванне адміністрацыі калоніі». Вызваліўся цалкам ён толькі напачатку 2010-га.
Комар троху ўзяўся за галаву і правёў на волі ажно чатыры гады. У 2013-м супраць яго заводзілі крыміналку за збіццё знаёмай, але яны памірыліся, і справа да суда не дайшла. Напачатку 2014-га супраць яго яшчэ раз завялі справу — за крадзеж невялікай сумы грошаў, але і тут ён выйшаў з вады сухім.
Але напрыканцы 2014-га Комар усё ж зноў трапіў за краты. Суд прызначыў яму 2 гады строгага рэжыму за паўторны крадзеж. Вызваліўся ў чэрвені 2016-га.
Працы, мяркуючы па базам «Кіберпартызанаў», ён не знайшоў. А праз два з паловай гады Комара зноўку арыштавалі — за крадзеж і ўхіленне ад нагляду. Суд прызначыў яму тры гады калоніі. Пасля яшчэ быў год пазбаўлення волі за парушэнне прэвентыўнага нагляду.
Па вызваленні ў маі 2023 года Комар прасядзеў дома адзін месяц. Невядома, якая была яго матывацыя, але ён паехаў ваяваць у ПВК «Вагнер». З 23 чэрвеня па 9 жніўня 2023 года ён ваяваў на баку Расіі.
Па вяртанні ў Беларусь яму ўсё прабачылі і дазволілі жыць дома. Але неўзабаве ён паўторна выехаў у Расію, каб працягнуць службу. Там у яго не зраслося, і ён вярнуўся — затрымалі яго ў Гомелі 24 верасня 2023 года.
На судзе мужчына казаў, што не ўхіляўся ад нагляду, а хацеў «паўдзельнічаць у СВА на баку Расіі».
Але суд гэта да ўвагі не прыняў. 11 снежня 2023 года Комару прысудзілі год калоніі за ўхіленне ад прэвентыўнага нагляду, а таксама прымусовае лячэнне ад алкагалізму, як і ў іншыя разы.
Гэта восьмая судзімасць мужчыны. Агулам з 2001 года ён правядзе за кратамі амаль чатырнаццаць гадоў.
Публікацыя зробленая з дапамогай Digital Intelligence Team. Гэта OSINT-праект, які супрацоўнічае з Кіберпартызанамі і іншымі дэмакратычнымі структурамі ды праектамі, якія падзяляюць дэмакратычныя каштоўнасці.
«Наша Нiва» — бастыён беларушчыны
ПАДТРЫМАЦЬЧыноўнікі прагаварыліся, што ў Беларусі засталося толькі 8,8 мільёна чалавек? Гэта няправільная выснова15
Каментары