Памерла котка — выканаўца мегапапулярнай у сацсетках песні. Вы дакладна яе чулі
«Яе яркае святло згасла, але пяшчотны галасок Калы будзе гучаць вечна».
Папулярны ў сацсетках аўтар трэкаў пад нікам The Kiffness, які стварае свае песні са звычайных відэа ў інтэрнэце, асабліва з удзелам котак, паведаміў аб смерці адной з яго самых вядомых гераінь — коткі па мянушцы Кала, якая праславілася дзякуючы трэку «I go meow».
У каментарах пад самім трэкам, які сабраў за месяц больш за 2,6 мільёна праглядаў на ютубе і шырока разышоўся ў тыктоку і іншых сацсетках, The Kiffness сёння напісаў наступнае.
«Гаспадыня Калы Элізабэт падабрала і ўдачарыла котку, думаючы, што яна зусім маленькая. Але пасля таго, як Кала захварэла, ветэрынары высветлілі, што ёй каля 12 гадоў. Хоць яны і былі настроены аптымістычна, а сама Кала ўпарта змагалася за жыццё, стан коткі толькі пагаршаўся, і ў рэшце рэшт яна памерла на руках Элізабэт ад старасці.
Калі ласка, далучайцеся да мяне і падзякуйце Элізабэт за тое, што яна выхавала Калу, забрала яе з вуліцы, дала ёй дом і за тое, што падзялілася са светам унікальнымі відэа з яе ўдзелам. Кала палепшыла наша жыццё і будзе працягваць рабіць гэта, нават калі яе больш няма з намі», — напісаў аўтар трэка «I go meow» у каментарах пад самой песняй.
Ён таксама дадаў словы самой гаспадыні Калы, якая падзякавала ўсім за тое, што зрабілі жыццё коткі вечным.
«Яе яркае святло згасла, але пяшчотны галасок Калы будзе гучаць вечна. Вы ўсе дазволілі Кале жыць вечна. Я ніколі не забуду, якая яна асаблівая. Дзякуй вам усім за тое, што любіце Калу гэтак жа моцна, як і я», — працытаваў словы Элізабэт аўтар пад нікам The Kiffness.
Нагадаем, што зусім нядаўна памёр яшчэ адзін папулярны герой інтэрнэт-мемаў — сіба-іну па мянушцы Кабосу, больш вядомы як «Доге». Сабаку было 18 гадоў.
Каментары