Чаму Польшча забараніла вываз тавараў фізічным асобам і якія тавары цяпер нельга правезці?
Раніца 4 ліпеня пачалася з інфармацыі, што палякі перасталі выпускаць беларусаў з новымі рэчамі, якія тыя набылі ў Польшчы. Разбіраемся, што здарылася.
Што адбываецца?
Усё пачалося з таго, што 29 чэрвеня 2024 года Еўрапейскі саюз узгадніў новыя санкцыі супраць Беларусі. Дакумент быў апублікаваны ў афіцыйным часопісе Еўрапейскага саюза 30 чэрвеня і набыў моц з 1 ліпеня.
Менавіта пасля гэтага стала вядома пра амаль што поўную забарону на ўвоз тавараў з Беларусі ў Латвію.
Рэгламент ЕС складаецца з 265 старонак, таму выглядае, што забароны пачынаюць дзейнічаць паступова і не сінхронна ў першую чаргу праз тое, што мытным службам патрэбны час, каб зразумець, як працаваць па новых правілах.
Паколькі рэгламент прыняты не толькі Польшчай, а Еўрапейскім саюзам, цалкам верагодна, што ўслед за палякамі беставарны выезд увядуць Латвія і Літва.
На што спасылаюцца?
Амаль усе ранейшыя абмежаванні і забароны ў першую чаргу тычыліся камерцыйных паставак і не закраналі фізічных асоб. Але не гэтым разам.
У артыкуле 1bb рэгламенту гаворыцца наступнае:
«Забараняецца прадаваць, пастаўляць, перадаваць або экспартаваць, прама ці ўскосна, тавары, якія маглі б спрыяць, у прыватнасці, умацаванню беларускіх прамысловых магутнасцяў, незалежна ад таго, паходзяць яны з Саюза ці не, як паказана ў дадатку XVIII, любой фізічнай або юрыдычнай асобе, арганізацыі або органу ў Беларусі або для выкарыстання ў Беларусі».
То-бок новыя абмежаванні распаўсюджваюцца ў тым ліку на звычайных людзей, якія набылі тавары ў ЕС і вывозяць іх у Беларусь для ўласных патрэб.
Што за тавары?
Спіс тавараў, забароненых да вывазу з Еўрасаюза ў Беларусь, пералічаны ў дадатку XVIII «Пералік тавараў і тэхналогій, якія могуць спрыяць павелічэнню прамысловага патэнцыялу Беларусі».
Пералік забароненых мытных кодаў займае больш за 30 старонак. У гэты спіс трапілі самыя разнастайныя пазіцыі, пачынаючы ад кветак і раслін і заканчваючы гузікамі і падушачкамі для чарніла.
Сярод папулярных тавараў — батарэйкі, мабільныя тэлефоны, маніторы, праектары, мікрафоны, гукавыя ўзмацняльнікі, абагравальнікі, некаторыя віды тканіны, пакрышкі для аўтобусаў і грузавікоў, бідэ, унітазы і шмат іншага.
Што пішуць у чатах?
Карыстальнікі адмысловых чатаў пішуць, што з Польшчы ў Беларусь нельга правезці любую тэхніку, аўтамабільныя запчасткі, у тым ліку б/у. Пры гэтым не важна, тавары едуць праз чырвоны канал (VAT) або праз зялёны.
Падарожнікаў, якія выязджаюць праз зялёны калідор, таксама правярае польская мытня, хоць раней пры выездзе з Польшчы такога ніколі не было, пішуць карыстальнікі.
«На прадукты харчавання, медыкаменты, а таксама на бытавую хімію VATы па-ранейшаму адзначаюць. Астатняе вывозіць нельга нават без VAT», — дзеліцца досведам беларус, які нядаўна перасек мяжу.
Што тычыцца адзення і абутку, то вывезці яго легальна з вяртаннем ПДВ таксама нельга, таму падарожнікі пішуць, што мытня прапускае адзенне без бірак і абутак без каробак. І толькі ў выпадках, калі ўдаецца пераканаць, што гэта ўжо б/у рэчы, якія патрэбныя на час паездкі.
Што кажа мытня?
Тлумачэнняў, што дакладна можна везці, а што не, прынамсі пакуль польская мытня не дае, суха спасылаючыся на той самы рэгламент, які краіны ЕС прынялі 29 чэрвеня. Падарожнікі спадзяюцца, што ў хуткім часе з'явіцца больш падрабязная інфармацыя, як перасякаць мяжу ў новых умовах.
Апроч абмежаванняў на вываз тавараў з ЕС у Беларусь, у дакуменце ўтрымліваюцца нормы, якія таксама тычацца забароны на экспарт шэрагу пазіцый з Беларусі, а таксама транзіту некаторых тавараў па тэрыторыі нашай краіны, калі пунктам прызначэння з'яўляюцца трэція краіны.
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам4444
Каментары