Экс-футбаліст зборнай пра сына Анатоля Капскага: На жаль, у клубе ўсё пафігачылі
«І ён, напэўна, падумаў, што гэта ўсё так лёгка, не трэба ні храна рабіць — чык-чык і столькі грошай».
Экс-абаронца БАТЭ і зборнай Беларусі Аляксей Рыас у інтэрв'ю праекту «На банцы» рэзка выказаўся пра цяперашняга кіраўніка барысаўскага клуба Андрэя Капскага.
- У Капскага-малодшага ёсць шанец стаць талковым функцыянерам?
— Толькі калі на камп'ютары, думаю. На жаль, усё ўжо пафігачана. Тое, што ён перш за ўсё зрабіў рэбрэндынг. Ён, напэўна, думаў, што гэта неяк дапаможа, але, на жаль, тут па-іншаму трэба. Маё меркаванне: БАТЭ заўсёды быў сям'ёй. Самыя галоўныя людзі былі, як Аляксей Бага (спачатку футбаліст, потым галоўны трэнер клуба) казаў, — гэта персанал. У нас было шмат людзей, якія па 20 гадоў працавалі. І калі іх пачалі прыбіраць… У Васіля Станіслававіча Віскушэнкі (адзін з загадчыкаў гаспадаркі клуба — НН) заробак быў 600 рублёў. Яму кажуць: «Давай 300?». І калі яны сыходзяць, то ты разумееш, што самыя галоўныя людзі сыходзяць.
І з гульцамі пачыналася… Цяпер успамінаю фразу [Андрэя Капскага]: «Не разумею, за што тата такія вялікія грошы плаціў». Магчыма, паўплывала тое, што калі памёр яго бацька, мы выйшлі ў групу Лігі Еўропы. Клуб добра зарабіў — прыкладна 15 мільёнаў еўра.І ён, напэўна, падумаў, што гэта ўсё так лёгка, не трэба ні храна рабіць — чык-чык і столькі грошай.
Мішу Гардзейчука не захаваў: «Хочаш — сыходзь, не хочаш — не сыходзь». Коля Сігневіч сышоў, Палячок [Дзяніс Палякоў]… Пачаў раскідвацца такімі людзьмі-адзінкавым таварам. Гардзяйчук пры сваёй не лепшай гульні мог заўсёды забіць.
Адказваючы на пытанне, думаю, наўрад ці. За кошт чаго — не ўяўляю. Яшчэ ў 2020 годзе, калі склад быў моцны, можна было. Але тады таксама нікуды не выйшлі.
З кожным годам усё менш грошай, у яго няма аўтарытэту, няма падтрымкі. Ён усіх ад сябе адсунуў. Раней [Аляксандр] Захарчанка памочнік быў. Але ўсіх ад сябе прыбраў. У мяне складваецца адчуванне, што ён нібыта думаў, што яго нехта хоча падседзець.
Я б на яго месцы адышоў ад спраў. Быў бы, можа, у структуры клуба, але аддаў бы яго больш дасведчанаму кіраўніку.
У яго не атрымалася пры нейкіх фінансах, цяпер, здаецца, гэта наогул нерэальна».
***
Доўгачасовы кіраўнік БАТЭ Анатоль Капскі памёр у верасні 2018 года, і клуб узначаліў ягоны сын Андрэй Капскі. БАТЭ ў сезоне-2018 яшчэ выйграў чэмпіянат краіны, а таксама паспяхова выступіў у Лізе Еўропы, прабіўшыся ў 1/16 фіналу, але затым ні разу не стаў чэмпіёнам і ні разу не прабіўся ў групавую стадыю еўракубкаў.
А ў 2023 годзе ўпершыню з 2005 года застаўся без медалёў чэмпіянату, заняўшы пятае месца, і не трапіў нават у кваліфікацыю еўракубкаў.
Зараз пасля першага круга першынства клуб займае 10-ы радок у турнірнай табліцы.
Каментары