«Паспелі развітацца з жыццём». Відавочцы расказалі пра смяротны ўраган на Вілейскім вадасховішчы
Жыхарка Мінска стала відавочцам урагану, які ў суботу накрыў кемпінг на Вілейскім вадасховішчы і забраў жыццё маладога мужчыны. Яна распавяла карэспандэнту «Мінскай праўды» падрабязнасці таго фатальнага дня.
— У нас быў арганізаваны турзлёт і пражыванне ў намётах на кемпінгу «Клёвае месца» з пятніцы па нядзелю. У пятніцу ішоў дождж, але потым распагодзілася, і мы добра адпачылі. А ў суботу ў нас былі квэсты, затым сплаў на байдарках і пасля абеду вельмі рэзка пачалася непагадзь. Пайшоў моцны дождж і вецер.
Каб схавацца, мы забеглі ў домік і зразумелі, што ад моцнага ветру галінкі дрэў абломваюцца і ляцяць на збудаванне. Домік пачало штарміць.
Мы ўтрымлівалі дах, потым у доміку парывам ветру вырвала дзверы — гэта было вельмі страшна, насамрэч. 20 чалавек нашай кампаніі туліліся ў гэтым доміку, чакалі, пакуль усё скончыцца.
Калі мы паглядзелі ў акенца, то ўбачылі, што адно з дрэў ўпала проста на нашу палатку і знесла намёт, дзе знаходзілася наша кухня. Дзве суседнія альтанкі проста перакуліліся.
У нейкі момант я сама пачала развітвацца з жыццём. Я думаю, як і ўсе, што таксама там знаходзіліся. Мы не разумелі, калі гэта скончыцца. Не ведаю, колькі па часе гэта доўжылася, але адчуванне, што гэта было вельмі доўга. І страх быў таксама вельмі вялікі.
Адзін хлопец з нашай кампаніі спаў у намёце ў той час, калі пачало ляцець галлё. Ён проста пачуў, прачнуўся і пабег хутчэй да нас у домік. Увогуле, выратавалі яго нейкія вышэйшыя сілы.
Хоць кемпінг у нас быў арандаваны да нядзелі мы з'ехалі дадому ў суботу ўвечары, адразу пасля шторму.
Усе нашы рэчы прамоклі, бо ляжалі ў намётах, патанулі тэлефон і паўэрбанкі. Усе сумкі былі мокрыя наскрозь, а палаткі проста паваліла.
Пацярпелых сярод нас не было. І толькі, калі мы прыехалі дадому даведаліся, што там хлопец загінуў. Ён быў з іншай кампаніі, — распавяла дзяўчына.
Нагадаем, у выніку непагадзі ў Беларусі ў суботу-нядзелю загінулі чатыры чалавекі.
Цяпер чытаюць
Андрэя Пачобута памянялі на лукашэнкаўскіх шпіёнаў, арыштаваных у Польшчы36
Каментары