Разам з УСУ на тэрыторыю Расіі ўвайшла амерыканская вайсковая група FOG. Што за яна?
Расійскі МЗС выклікаў часовага паверанага ў справах ЗША з-за прысутнасці ў Курскай вобласці «амерыканскай ПВК». І сапраўды, адна з амерыканскіх вайсковых арганізацый выклала фоты свайго ўдзелу ва ўкраінскай аперацыі пад Курскам, чым выклікала масавую істэрыю расіян. Расказваем, што вядома пра групу FOG і наколькі яна моцная.
Амерыканская недзяржаўная вайсковая арганізацыя Forward Observations Group («Група нападу і назірання»/FOG), якая складаецца з былых марпехаў і спецназаўцаў ЗША, прызнала свой удзел ва ўкраінскім наступе пад Курскам.
Гэта выклікала жорсткую рэакцыю расійскага МЗС, які абвінаваціў ЗША ў адкрытай агрэсіі супраць Расіі і абвясціў «амерыканскіх наймітаў» законнай вайсковай цэллю, перадае руская служба Бі-бі-сі.
Абурыліся навіной і расійскія Z-каналы, якія паўтаралі ўслед за МЗС пагрозы ў бок амерыканцаў. У Савеце Федэрацыі Расіі, у сваю чаргу, паабяцалі «амерыканскім наймітам» або смерць, або пажыццёвае зняволенне за наёмніцтва ў выпадку іх траплення ў палон.
Разабраліся, адкуль увогуле ўзяліся ва Украіне прафесійныя (хоць і былыя) амерыканскія вайскоўцы, ці можна іх лічыць наймітамі і якімі магчымасцямі валодае група FOG.
Што сабой уяўляе FOG?
Нягледзячы на расійскія абвінавачванні ў наёмніцтве амерыканская група FOG, якая ўвайшла пад Курск, не з'яўляецца прыватнай ваеннай кампаніяй. Афіцыйна арганізацыя называе сябе толькі «брэндам вайсковага ладу жыцця», які аб'ядноўвае ветэранаў баявых дзеянняў, якія звольніліся з узброеных сіл ЗША. Тыя, хто ўвайшлі ў склад арганізацыі, лічацца «добраахвотнікамі».
Як піша выданне Vice News, група FOG была заснаваная былым амерыканскім марпехам Дэрэкам Бэйлсам, які служыў у Афганістане ў складзе 173-й паветрана-дэсантнай брыгады ЗША, і першапачаткова ўяўляла сабой брэнд тактычнага вайсковага начыння.
Аднак потым члены групы ў якасці «рэпарцёраў» і «медыкаў» сталі з'яўляцца ў гарачых пунктах Блізкага Усходу, дзе здымалі кадры мясцовых боесутыкненняў і дапамагалі параненым жыхарам і салдатам медыкаментамі. Тое ж самае члены FOG рабілі і ва Украіне яшчэ да поўнамаштабнага расійскага ўварвання.
Пры гэтым, як адзначае Vice News, некаторыя члены FOG ужо ў 2018-2021 гадах аказвалі непасрэдную вайсковую дапамогу ўкраінскай арміі ў вайне з прарасійскімі сепаратыстамі на Данбасе.
Кіраўнік FOG Дэрэк Бэйлс афіцыйна абвяргаў удзел сваіх добраахвотнікаў у баях ва Украіне, але ягоны прэс-сакратар заявіў, што прыезд членаў FOG на Данбас узгадняўся са Службай бяспекі Украіны і Міністэрствам абароны краіны.
У дадатак да гэтага сам Бэйлс публікаваў відэа на YouTube (цяпер выдалена), дзе ён разам з байцамі FOG удзельнічае ў баях за аэрапорт Данецка. Былі і сумесныя фоты Бэйлса з членамі ўкраінскага батальёна «Азоў», адзначае Vice News.
З таго моманту група FOG стала мішэнню расійскай прапаганды, якая тым самым хацела даказаць «адказнасць ЗША за развязванне канфлікту на Данбасе». У прыватнасці, група ў 2021 годзе абвінавачвалася Крамлём у спробах зладзіць правакацыю з прымяненнем хімічнай зброі, што адмаўляла як сама група, так і ўрады ЗША і Украіны.
Калі праз год Расія ўварвалася ва Украіну, група FOG адразу пачала дзейнічаць на многіх кірунках фронту, у тым ліку ў абароне Кіева і Бахмута.
Байцы FOG сталі актыўна выкарыстоўваць сімвал, на якім рагаты шкілет з аўтаматам і капʼём працінае чырвоную літару F, з якой пачынаецца назва групы.
Колькасць байцоў у складзе FOG дакладна невядомая. Расійскія Z-рэсурсы сцвярджаюць, што ва Украіне ваюе некалькі сотняў былых амерыканскіх марпехаў, аднак улады Украіны і ЗША гэтую інфармацыю не пацвярджалі.
Сама група ў сацсетках дэманструе, што выкарыстоўвае ў сваіх аперацыях лёгкую бранятэхніку, транспартную і баявую авіяцыю (акрамя знішчальнікаў) і марскія катары. Байцы FOG носяць стандартнае амерыканскае ўзбраенне і браню.
Акрамя Украіны, група FOG (мяркуючы па яе сацсетках) адначасова дзейнічае ў Сірыі, Іраку, Емене і сектары Газа, дзе трэніруе мясцовыя сілы бяспекі, а таксама ваюе супраць ісламісцкіх тэрарыстаў і праіранскіх баевікоў. Наконт магчымых боесутыкненняў у гэтых краінах з расійскімі вайскоўцамі ці наймітамі «Вагнера» амерыканская група нічога не паведамляла.
Пры гэтым у «Вагнера» ёсць зуб на FOG, што, у прыватнасці, выражалася ў продажы расійскімі наймітамі мерчу з выявамі, дзе адзінокі вагнеравец заносіць кувалду над асноўным сімвалам FOG.
«Наша Нiва» — бастыён беларушчыны
ПАДТРЫМАЦЬ
Каментары