У спісе ўладальнікаў вагнераўскага сімвала — які таксама стаў сімвалам беззаконня, бесчалавечнасці і ваенных злачынстваў — Лукашэнка, Гайдукевіч, Азаронак і нават касманаўт Навіцкі. «Вагнераўская кувалда» экспануецца ў музеях і яе паказваюць дзецям.
Кувалдай вагнераўцы публічна і без суда караюць тых, хто перад імі правініўся.
Пасля таго, як у 2022 годзе наёмнікі ёю дэманстратыўна забілі свайго былога саслужыўца за тое, што ён трапіў ва ўкраінскі палон, расійская і прарасійская прапаганда стварыла з гэтага інструмента «палітычны мем».
«Вагнераўскія» кувалды ў Расіі дораць палітыкам і грамадскім дзеячам.
Завядзёнку дарыць кувалды перанялі і лукашысты. Яны не згадвалі, што такі прэзент «вагнераўскі», але агульны пасыл не пакідаў сумневу, хто пачынальнік «моды».
«Эксклюзіўную і цяжкую» кувалду падарылі кіраўніку Ліберальна-дэмакратычнай партыі, былому сілавіку Алегу Гайдукевічу.
Відэа з уручэннем кувалды было апублікавана ў яго тэлеграм-канале 23 чэрвеня. Тады яшчэ не было вядома, што вагнераўцы абвясцілі паход на Маскву.
Кувалду Гайдукевічу падарыў аднапартыец з нагоды перарэгістрацыі партыі.
Гайдукевіч сказаў, што кувалдай «будзе жорстка адстойваць інтарэсы краіны».
Кувалду падарылі і Лукашэнку.
Гэты інструмент у футляры ад скрыпкі стаў экспанатам у Палацы Незалежнасці. На кувалдзе чытаецца дароўны надпіс, які пачынаецца словамі «Александру Григорьевичу…».
Незвычайны экспанат паказалі выхаванцам вайскова-патрыятычнага цэнтра спецпадрыхтоўкі «Скіф» з Рэчыцы і абласнога вайскова-патрыятычнага клуба «Доблесць».
Прапагандыст Рыгор Азаронак таксама мае кувалду.
Азаронку яе ў красавіку на суботніку падарыў сам Лукашэнка са словамі, «каб ведалі».
А вось, сапраўдная «кувалда ад «Вагнера» дасталася касманаўту з Беларусі Алегу Навіцкаму.
Яе ўручылі яму на святкаванні Дня Расіі ў мікрараёне Зорны ў расійскім Іванаве.
«Алегу Віктаравічу мы ўручаем кувалду вагнераўскую. Мы так жартуем, так. Натуральна, мы за ўсё добрае», — заявіў вядоўца на сцэне.
З «кувалды ад заснавальніка брэнда» зрабілі экспанат музея ў гімназіі ў Рэчыцы.
Гэтым пахваліўся прарасійскі актывіст Уладзімір Габраў, які вядомы ў райцэнтры як кіраўнік вайскова-патрыятычнага цэнтра спецыяльнай падрыхтоўкі дапрызыўнай моладзі «Скіф». Ён заяўляе, што на рукаятцы распісаўся адзін з заснавальнікаў ПВК «Вагнер» па мянушцы Бес.
Такі пазыўны меў вагнеравец Мікалай Будзько, беларус з Магілёўшчыны. Ён быў удзельнікам вайны ў Сірыі. У 2017 годзе ён загадаў забіць кувалдай мясцовага жыхара, якога перад гэтым катавалі, здымаючы экзекуцыю на відэа, пазней размешчанае ў інтэрнэце. Яно шакавала свет.
У Расіі ж кувалда стала «сімвалам помсты». Яе высылаюць у еўрапейскія структуры, кідаюць на тэрыторыі дыпламатычных прадстаўніцтваў, адпраўляюць на фронт з гуманітарнай дапамогай, прыносяць на пахаванні.
Паўстанне вагнераўцаў, калі яно будзе задушана, паставіць крыж і на іх сімволіцы, у тым ліку на абагаўлёнай да гэтага ў Расіі кувалдзе. Пра яе пастараюцца забыцца. Відаць, і лукашыстам давядзецца адправіць кувалды на металалом і больш не выхваляцца.
«Наша Нiва» — бастыён беларушчыны
ПАДТРЫМАЦЬГлядзіце таксама:
«Не прэзідэнту Беларусі пра гэта гаварыць». Беларускія прапагандысты пераляканыя мяцяжом Прыгожына
Валерый Сахашчык заклікаў «аб’яднаць сілы і ўратаваць радзіму»
«Крывавая вайна вярнулася ў Расію бумерангам» — прэзідэнт Літвы
Жываглод прызнала рассылку праз чат-бот «Сумленных людзей» карыстальнікам у Беларусі: Але не ў працоўны час, пасля 18 гадзін8
Каментары