Забойства Насралы: дэталі аперацыі і рэакцыя свету

Ізраільскія ўлады сачылі за месцазнаходжаннем лідара «Хезбалы» Хасана Насралы цягам некалькіх месяцаў, піша The New York Times.

У Ізраілі лічылі, што ў найбліжэйшы час ён мог некуды схавацца, таму вырашылі нанесці ўдар у пятніцу ўвечары па штаб-кватэры ў Бейруце, дзе сабраліся камандзіры «Хезбалы», расказалі тры чыноўнікі ў ізраільскім Мінабароны.

На іх думку, пасаду генеральнага сакратара «Хезбалы» пасля забойства Насралы можа заняць кіраўнік выканаўчай рады ліванскай партыі і яго стрыечны брат Хашам Сафіедзін, які не прысутнічаў на сходзе ў пятніцу.

Паводле звестак NYT, аперацыю планавалі з пачатку тыдня, калі ізраільскае кіраўніцтва, незадоўга да ад'езду прэм'ер-міністра Ізраіля Біньяміна Нетаньяху ў Нью-Ёрк, абмяркоўвала з прадстаўнікамі ЗША магчымасць спынення агню ў Ліване.

Гэтую інфармацыю пацвердзілі і двое суразмоўцаў Axios, удакладніўшы, што ўпершыню план абмяркоўваўся 25 верасня. Па словах аднаго з іх, аперацыя матываваная тым, што «Хезбала» пад кіраўніцтвам Насралы адмаўлялася «дыстанцыявацца» ад ХАМАСа, працягнуўшы наносіць удары па паўночнай тэрыторыі Ізраіля.

Як паведамляе Telegraph са спасылкай на ізраільскага чыноўніка, паездка Нетаньяху ў Нью-Ёрк стала часткай «адцягвальнага манеўру»: кіраўніцтва «Хезбалы» павінна было паверыць, што Ізраіль не распачне ніякіх радыкальных дзеянняў пры адсутнасці свайго лідара, таму Насрала знаходзіцца ў бяспецы.

У момант удару па штабе ў Бейруце лідар групоўкі, як мяркуецца, слухаў прамову ізраільскага прэм'ер-міністра на сесіі Генасамблеі ААН, дадала крыніца. Нетаньяху ўхваліў удар проста перад сваім выступам.

У Іране пасля смерці Хасана Насралы аб'явілі ажно пяцідзённую жалобу. Лідары гэтай дзяржавы, якая ўсімі спосабамі падтрымлівае «Хезбалу», выказалі шкадаванне з нагоды ягонай гібелі. Вярхоўны лідар Ірана, 85-гадовы Алі Хаменеі, выказаўся надзвычай эмацыйна:

«Забойствы безабаронных людзей у Ліване яшчэ раз паказалі ўсім лютасць шалёнага сіянісцкага сабакі, даказалі недальнабачнасць і глупства палітыкі лідараў узурпатарскага рэжыму. Тэрарыстычная банда не змагла зразумець, што масавыя забойствы не могуць паўплываць на трывалую структуру арганізацыі супраціву і разбурыць яе».

 У той жа час прэзідэнт Ірана Масуд Пезешкіян лічыць, што прыняцце пакутніцкай смерці было даўняй марай Саеда Хасана Насралы, і што ён «гонар мусульман і сімвал супраціву». Загад жа на ягонае забойства, маўляў, быў дадзены ЗША.

Прэзідэнт ЗША Джо Байдэн, аднак, падкрэслівае, што 

«ЗША не былі паведамленыя і не ўдзельнічалі ў дзеяннях ізраільскіх Узброеных сіл».

Але ў той жа час ён адзначыў:

«Гібель Насралы ў выніку ізраільскага авіяўдару — гэта акт правасуддзя для яго шматлікіх ахвяр, сярод якіх тысячы амерыканцаў, ізраільцян і ліванцаў». 

З асуджэннем дзеянняў Ізраіля выступіў прэзідэнт Турцыі Рэджэп Таіп Эрдаган. Ён сказаў, што нібыта «Ліван і ліванскі народ сталі апошняй мэтай палітыкі генацыду, акупацыі і ўварвання, якая праводзіцца Ізраілем з 7 кастрычніка».

Прагназавана асудзіла Ізраіль і МЗС Расіі:

«Рашуча асуджаем здзейсненае Ізраілем чарговае палітычнае забойства. Гэтая сілавая акцыя багатая яшчэ вялікімі драматычнымі наступствамі для Лівана і ўсяго Блізкага Ўсходу. Ізраільскі бок не мог не ўсведамляць такую небяспеку, але пайшоў на падобны крок — на забойства ліванскіх грамадзян, што практычна непазбежна справакуе новы ўсплёск гвалту. Такім чынам, на яе кладзецца ўся паўната адказнасці за наступную эскалацыю».

• 16
• 1
• 9
• 1
• 0
• 0
• 0
• 1