Школьнікі ў Расіі выбеглі на пляцоўку падчас матча дзеля грошай ад Mellstroy. Гамяльчук не заплаціў, а бацькоў аштрафавалі
Самарскія падлеткі вырашылі «зарабіць» грошай, а цяпер абвінавачваюць беларускага трэш-стрымера ў падмане.
Два 17-гадовыя падлеткі выбеглі на пляцоўку падчас прафесійнага баскетбольнага матча паміж «Самарай» і «Астаной» 13 сакавіка. У руках аднаго з хлопцаў быў плакат з надпісам «Mellstroy» — гэта псеўданім гомельскага трэш-стрымера Андрэя Бурымы.
Падлеткі сцвярджаюць, што яны спадзяваліся атрымаць ад блогера 4 мільёны расійскіх рублёў (41 тысячу даляраў). Аднак грошай яны так і не атрымалі, паведамляе Baza.
Пасля «перфомансу» хлопцаў затрымалі ахоўнікі арэны, а затым іх адправілі ў паліцыю. У аддзяленні яны прабавілі да позняй ночы, але выйшлі задаволеныя: школьнікі ўжо абмяркоўвалі, на што яны патрацяць грошы.
На наступны дзень яны звязаліся з адміністратарамі блогера — тыя паабяцалі заплаціць. Але пасля гэтага перасталі адказваць на паведамленні. Хлопцы спрабавалі прыцягнуць увагу самога блогера. Напрыклад, яны адпраўлялі яму новыя данаты на стрым. Але рэакцыі не было.
Больш за тое, па правілах спаборніцтваў камандзе «Самара» за дзеянні падлеткаў быў выпісаны штраф 500 тысяч рублёў (5 тысяч даляраў). Клуб штраф заплаціў, але вырашыў патрабаваць грошы з бацькоў школьнікаў.
Тым прыйшлося браць крэдыты, каб выплаціць гэты штраф. Акрамя таго, яны заплацілі адміністрацыйны штраф за сваіх дзяцей.
Гомельскі блогер Mellstroy атрымаў скандальную вядомасць у 2020 годзе, калі падчас аднаго з сваіх стрымаў збіў дзяўчыну. Пасля гэтага на Бурыму была заведзена крымінальная справа. У выніку ён атрымаў паўгода выпраўленчых работ і штраф.
Mellstroy у цэлым рэгулярна трапляе ў скандальныя навіны, даючы сваім гледачам вар'яцкія заданні і абяцаючы шчодрыя выплаты за іх выкананне. Тым не менш, гэтыя абяцанні не заўсёды выконваюцца.
Так, літоўскі хлопчык, які з гумарам папрасіў прэзідэнта сваёй краіны Гітанаса Наўседу перадаць прывітанне Mellstroy, з двух мільёнаў долараў, якія былі абяцаны за гэта, зможа атрымаць, добра калі, «толькі» 100 тысяч. Іншаму чалавеку было адмоўлена ў выплатах мільярда расійскіх рублёў (каля 11 мільёнаў даляраў) за размяшчэнне ніка Mellstroy на Месяцы.
1 чэрвеня на фінале Лігі чэмпіёнаў па футболе ў Лондане на поле выбег 16-гадовы падлетак у футболцы з лагатыпам Mellstroy. На судзе ён патлумачыў, што блогер абяцаў яму 385 тысяч даляраў. У выніку падлетка асудзілі да ўмоўнага тэрміну на шэсць месяцаў і абавязалі аплаціць уклад на пакрыццё судовых расходаў.
Цяпер чытаюць
У сям'і Міронцавых за палітыку ўжо асудзілі маці і трох сясцёр. А цяпер арыштавалі і мужа адной з сясцёр3
Каментары