Пра закуліссе шоу расказаў адзін з удзельнікаў праекта комік Дзмітрый Нарышкін. У ток-шоу ён граў ролю кадэбэшніка.
Сваімі ўражаннямі Нарышкін падзяліўся ў выпуску ютуб-канала «Медыяжаба».
Па словах коміка, праект «Ноч з Чалым» першапачаткова не імкнуўся быць традыцыйным late-night show (вечаровым забаўляльным ток-шоу), нягледзячы на вонкавае падабенства. Яго аўтары хацелі эксперыментаваць, ствараючы грамадска-палітычнае шоу, дзе фокус змешчаны на аналітыку і экспертызу Сяргея Чалага, а не на забаву.
Як успамінае Нарышкін, «калі быў запісаны першы выпуск, мабыць, адбыўся нейкі рассінхрон».
«Я не ведаю, якім чынам у прэс-рэліз патрапіла слова late-night. (…) Але ўнутры, у камандзе, не выкарыстоўвалася late-night. Усе разумелі, што late-night — гэта больш сатыра, іронія, сарказм і гумар. А тут усё ж заставаліся ў тым, што гэта Сяргей Вячаслававіч [Чалы]. І там унутры ёсць нейкія штукі. Але ніхто не кажа, што гэта гумарыстычны праект».
Чаму закрылася шоу
Дзмітрый Нарышкін кажа, што прычынай спынення праекта магла быць стомленасць Сяргея Чалага.
«У Сяргея Вячаслававіча была [праграма] «Эканоміка» кожны тыдзень, нешта яшчэ, і раз на два тыдні вось такі вялікі, паўтара-двух-трох гадзінны праект, які мы пачыналі пісаць за тыдзень, і ён ва ўсім у гэтым удзельнічаў. Здымкі пачынаюцца, у 12 дня ён ужо на пляцоўцы. Грым. Прапісалі без людзей. Прыйшлі людзі. Прапісаліся з людзьмі. Усё гэта прагнаць. І заканчвалася гэта ўсё ў 10-11 вечара, і ён стамляўся, гэта было відаць».
Другой прычынай закрыцця, паводле слоў Нарышкіна, можа быць тое, што праект быў «грувасткі і вялікі».
Колькі каштавалі здымкі аднаго выпуску, комік не называў. Адзначае, што гэта быў дарагі праект і некаторыя іх бюджэту зайздросцілі.
Нарышкін мяркуе, што, магчыма, «Ноч з Чалым» закрылася не назаўсёды.
«Калі мы разыходзіліся, не было сказана, што праект зачынены, тыпу, сто адсоткаў. Ёсць верагоднасць, што, можа быць, будзе другі, вялікі сезон».
Роля персанажа-чэкіста
Дзмітрый Нарышкін адзначае, што персанажа-чэкіста, якога ён граў у праекце, прыдумаў рэжысёр.
«Мне падабаўся персанаж, мне здаецца, ён разбаўляў, плюс яшчэ былі рэфрэны, адсылкі на тое, што ў Беларусі адбываецца», — дзяліцца комік і адзначае, што ў яго з рэжысёрам была дамоўленасць аб тым, каб паказаць развіццё персанажа ў ходзе праекта.
«Спачатку ён вельмі жорсткі, тыпу за сістэму, але з такімі, з пад***камі. Ну, гэта значыць, такі, ведаеце, старой школы кадэбэшнік, які, здаецца, і нашым, і вашым, а насамрэч ён гуляе ў сваю гульню. (…) У чацвёртым ці пятым выпуску, ён пачынаў ужо беларускай мовай карыстацца. Гэта таксама былі спецыяльныя адсылкі, паказваць вось гэты боль пра беларусаў, якім складана прыняць, ім складана недзе загаварыць па-беларуску».
Нарышкін успамінае, што спачатку яго персанаж з'яўляўся толькі ў першым блоку. Пазней было вырашана, што ён будзе прысутнічаць ва ўсіх трох. І для яго было вельмі складана ўлавіць момант, дзе можна далучыцца.
Гледачам у студыі, якія не хацелі паказваць свае твары, выдавалі маскі з тварам Сяргея Чалага.
Сяргея Чалага і журналістаў Беларускага расследавальніцкага цэнтра абвясцілі ў міждзяржаўны вышук
«Ноч з Чалым» — якім быў першы выпуск
«Здарылася нейкая нешараговая падзея». Чалы прагназаваў, што Лукашэнка не пойдзе на выбары, цяпер тлумачыць, чаму ўсё ж ідзе
Комік Нарышкін запускае беларускамоўны падкаст
Цяпер чытаюць
Аналітык Генштаба, які маляваў карту «адкуль рыхтавалася нападзенне», апынуўся ў СІЗА КДБ за працу на ўкраінскую разведку9
Каментары