Байпол назваў імёны магчымых забойцаў Андрэя Зельцэра. І заявіў, што сілавіка «Нірвану» застрэліў свой жа
У сваім новым расследаванні супрацоўнікі Байпол прадставілі сваё бачанне падзей, якія адбыліся ў кватэры Андрэя Зельцэра.
Згодна з афіцыйнай версіяй, «28 верасня 2021 года падчас правядзення спецмерапрыемстваў па адпрацоўцы адрасоў, па якіх маглі знаходзіцца асобы, датычныя да тэрарыстычнай дзейнасці, супрацоўнікі праваахоўных органаў прыйшлі ў кватэру да Андрэя Зельцэра».
Сілавікі выбілі дзверы, а ўнутры іх са стрэльбай у руках сустрэў 31-гадовы айцішнік. Па версіі сілавікоў, ён зрабіў выстрал, якім пацэліў у свайго аднагодка, супрацоўніка КДБ Дзмітрыя Федасюка з пазыўным «Нірвана».
Байполайцы ў сваім расследаванні сцвярджаюць, што відэа, якое пазней распаўсюдзілі сілавікі, з'яўляецца змантаваным, і прыводзяць шэраг доказаў.
Таксама яны сцвярджаюць, што выстрал з ружжа з'яўляецца пастановачным, знятым асобным дублем.
«З улікам цэлай масы пастановачных матэрыялаў мы мяркуем, што Зельцэр мог і не зрабіць выстрал», — заўважаюць байполаўцы і выказваюць сваю версію: Федасюк быў смяротна паранены сваім калегай.
Расследвальнікі сцвярджаюць, што відэа было наўмысна скамбінавана з мэтай адвесці ад адказнасці ўдзельніка штурмавой групы, які дапусціў самастрэл і забіў Федасюка. Да таго ж, калі б былі выяўлены факты парушэння мер асабістай бяспекі пры правядзенні аперацыі, пасмяротныя выплаты сям'і Федасюка нельга было б рабіць.
Пра тое, што выстрал быў зроблены менавіта ззаду, па меркаванні байполаўцаў, сведчыць і цёмнае вянознае кровацячэнне, якое ў пацярпелага спераду — там, дзе большая адтуліна. Пры раненні менавіта выхадная адтуліна большая, чым уваходная.
Акрамя гэтага, яны звяртаюць увагу на тое, што цела смяротна параненага завалілася наперад, што характэрна пры атрымання ранення ззаду. Байполаўцы заўважаюць, што пры выстрале з паляўнічага ружжа ў Федасюка разарвала б грудную клетку і адкінула на сцяну ад ударнай сілы стрэлу.
Хто мог забіць Зельцэра
Байплаўцы сцвярджаюць, што інфармацыю аб складзе групы «Альфа» КДБ, якая ўзламала дзверы ў кватэру Зельцэра, ім паведаміла адна з дасведчаных крыніц.
Яны называюць некалькі імёнаў.
Першы — гэта Васіль Уладзіміравіч Кірэйка (1985 года нараджэння), ураджэнец вёскі Палонка Баранавіцкага раёна Брэсцкай вобласці. На ваеннай службе ён з 2012 года. Займаў пасаду камандзіра ўзвода, служыў у тым ліку ў 33-м асобным гвардзейскім атрадзе спецыяльнага прызначэння сіл спецыяльных аперацый Узброеных сіл Беларусі (вайсковая частка 97020, якая дыслакуецца ў Віцебску). З 2019 года Кірэйка быў пераведзены ў спецпадраздзяленне «Альфа» КДБ.
На відэа мужчына, падобны сваім целаскладам да Кірэйкі, стаіць злева ў чорна-белай кепцы. Менавіта ён выцягвае параненага Нірвану з кватэры.
Другі — Аляксандр Васільевіч Зыкаў (1983), ураджэнец Віцебска. З 2007 года мужчына служыў у 5-й асобнай брыгадзе спецыяльнага прызначэння сіл спецыяльных аперацый Узброеных сіл Беларусі, затым у тым жа 33-м асобным гвардзейскім атрадзе спецыяльнага прызначэння. З 2014 года мужчына быў пераведзены ў спецпадраздзяленне «Альфа» КДБ.
З вялікай верагоднасцю менавіта Зыкаў з'яўляўся камандзірам групы. Ён знаходзіўся ззаду і аддаваў каманды.
Трэці — Дзмітрый Аляксандравіч Курынной (1987), ураджэнец Віцебска. Пра яго вядома няшмат. Да пераходу ў КДБ мужчына служыў у розных падраздзяленнях Узброеных сіл Беларусі.
На 20-й секундзе відэа чуваць, як Нірвана гаворыць: «Дзіма, давай!» — і супрацоўнік у кепцы пачынае біць молатам па дзвярах. Імя Дзмітрый супадае з імем Курыннога.
Байполаўцы сцвярджаюць, што максімальна праверылі атрыманую інфармацыю праз людзей, якія асабіста знаёмыя з названымі супрацоўнікамі. Аднак з-за таго, што твары сілавікоў заблюраны, нельга з поўнай упэўненасцю сцвярджаць, што на відэа менавіта Кірэйка, Зыкаў і Курынной.
У сваім расследаванні байполаўцы таксама тлумачаць, навошта сілавікі прыйшлі ў кватэру да Андрэя Зельцэра і Марыі Успенскай, якія не былі заўважаны ў пратэстах.
Байполаўцы сцвярджаюць, што з імі звязаўся брат Марыі Максім Юрчанка. Як патлумачыў мужчына, 26 верасня 2021 года на сваёй старонцы ў інстаграме ён размясціў відэа акцыі групы беларускіх партызан «Чорны бусел» аб атацы з дапамогай дрона базы АМАП ва Уруччы. На шчасце, Максім у кватэры не пражываў і знаходзіўся ў той час за мяжой у Грузіі.
Байпол назваў імёны магчымых забойцаў Андрэя Зельцэра. І заявіў, што сілавіка «Нірвану» застрэліў свой жа6
Каментары
они отважные только против безоружных, а как видят оружие у других от страха начинают палить куда глаза глядят.. даже если "по своим"..