Беларусы Гданьска хочуць прыбраць партрэт Пратасевіча з плаката каля Еўрапейскага цэнтра Салідарнасці
Беларусы Гданьска склалі адкрыты ліст да Еўрапейскага цэнтра Салідарнасці з просьбай прыбраць партрэт Рамана Пратасевіча з плаката, прысвечанага беларускім палітвязням. Яны сцвярджаюць, што цяпер ягоная праца шкодзіць справе беларусаў. Зараз пад лістом збіраюць подпісы, піша Most.
«Мы перакананыя: прысутнасць партрэта Рамана Пратасевіча ў самым сэрцы Гданьска стала небяспечна блізкаю да рэкламавання ягоных сумнеўных паслуг ды прасоўвання прыкрых прапагандысцкіх тэзаў», — пішуць ініцыятары.
Банер з партрэтамі вядомых беларускіх палітвязняў з’явіўся каля Еўрапейскага цэнтра Салідарнасці ў 2021 годзе. Сярод выяў апынуўся і партрэт Рамана Пратасевіча, экс-рэдактара тэлеграм-канала Nexta, арыштаванага ў выніку аперацыі па пасадцы ў Мінску самалёта авіякампаніі Ryanair.
Тады ён быў адным з сімвалаў пратэсту, але праз тры гады стаўленне да яго ў беларусаў змянілася, бо Пратасевіч актыўна супрацоўнічае з беларускім рэжымам.
У канцы кастрычніка ў закрытым чаце беларусаў Гданьска прайшло апытанне на тэму таго, ці варта здымаць партрэт Пратасевіча. Сярод 77 удзельнікаў 70% выказаліся за тое, каб яго зняць, і 30% — за захаванне партрэта.
«Пратасевіч — знакавая, у некаторых момантах ключавая постаць падзей беларускай рэвалюцыі 2020 года, — лічыць актывіст дыяспары пад нікам Ufulu. — Яго затрыманне праз авіяпірацтва паспрыяла прыцягненню ўвагі да Беларусі ў 2021 годзе, пачаліся значныя санкцыі, чаго не было нават пасля гвалту ў Беларусі ў 2020-м… Ён шаблон ламання людзей рэжымам. Чалавек, які пагадзіўся на супрацоўніцтва з рэжымам па дагэтуль невядомых прычынах. Яго гісторыя як ахвяры рэжыму яшчэ не скончаная, мы дакладна не ведаем, што і як з ім рабілі. Але гэта не адмяняе таго факта, што ён супрацоўнічае зараз з рэжымам».
Але многія актывісты ўпэўненыя, што партрэт трэба прыбраць ці хаця б дапоўніць каментарамі, якія адлюстроўвалі б бягучае становішча.
Ініцыятар збору подпісаў за зняцце партрэта Яўген Грышчанка лічыць, што цяперашнія дзеянні Пратасевіча могуць быць небяспечнымі для беларусаў:
«Раман прапануе людзям звяртацца да яго па дапамогу, якая абернецца вязніцаю ды пакутамі».
Актывіст таксама падкрэслівае, што партрэт Пратасевіча можа ўспрымацца як рэклама ягонай цяперашняй дзейнасці. Яўген лічыць, што яго месца павінен заняць іншы сімвал беларускай барацьбы — той, хто працягвае супраціў і сёння.
Уладзімір Чудзянцоў выйшаў на свабоду і сустрэўся з Пратасевічам
Пратасевіч кажа, што ездзіў у Дубай не толькі на адпачынак
Праўладны канал: Чаму Пратасевіча ўзялі на працу, а беларусаў, якія легальна ставілі подпісы за альтэрнатыўных кандыдатаў, не бяруць?
Перад тым, як агучыць свой заробак, Пратасевіч паглядзеў на кагосьці за кадрам
Азаронак пахваліўся, што гэта была яго ідэя пакласці нацыянальны сцяг пад ногі Пратасевічу
Каментары