«На што павінна пайсці Расія? Пажадана на тры літары». На сустрэчы з Шольцам Зяленскі не быў дыпламатычным
Прэзідэнт Украіны Уладзімір Зяленскі правёў супольную прэс-канферэнцыю з федэральным канцлерам Германіі Олафам Шольцам, які сёння прыехаў з папярэдне не анансаваным візітам у Кіеў.
Падчас прэс-канфэрэнцыі Зяленскі заявіў, што «каб скончыць вайну ў 2025 годзе, Украіна павінна быць мацнейшай», а таксама анансаваў новыя перастаноўкі ў камандаванні УСУ, каб «рухацца хутчэй»
Аднак жа рухацца хутчэй немагчыма без дзейнай падтрымкі заходніх саюзнікаў. «Украіна магла б паразіць больш вайсковых цэляў РФ, калі б Германія дала ёй ракеты Taurus», — падрэсліў Зяленскі.
Адказваючы на пытанне, на якія магчымыя саступкі можа пайсці Расія на патэнцыйных перамовах, украінскі прэзідэнт не быў дыпламатычным:
«На што павінна пайсці Расія? Пажадана на тры літары», — заявіў Уладзімір Зяленскі перад пачаткам свайго адказу.
А ўжо пасля яго папрасіў прабачэння за недыпламатычную лексіку.
У сваю чаргу, Шольц заявіў, што ўжо ў снежні Германія перадасць Украіне шостую сістэму СПА IRIS-T, а таксама пускавыя ўстаноўкі для Patriot. Акрамя таго, Украіна атрымае самаходныя зенітныя ўстаноўкі Gepard і верталёты Sea King.
Пры гэтым нямецкі канцлер падкрэсліў, што Германія не аслабіць дапамогу, назваўшы «недапушчальнымі» абстрэлы расіянамі ўкраінскай энергетычнай інфраструктуры.
Пра гэта ён, як сцвярджае, гаварыў і падчас нядаўняй размовы з Пуціным:
«Украіна мае сваё войска, свае Узброеныя сілы, і можа дасягнуць сваёй поўнай незалежнасці. Гэта азначае, што Расія павінна спыніць вайну і вывесці свае войскі. Я яму гэта выразна сказаў», — адзначыў Шольц.
Таксама ён расказаў пра размову з Пуціным у пачатку 2022 года і заявіў, што Расія «пачаць гэтую вайну вырашыла яшчэ за два гады да пачатку».
Каментары