Кіраўніка крымінальнай міліцыі Клімавічаў арыштавалі за хабар. Пагражае да 15 гадоў
У пачатку 2024 года Аляксандр Кухараў атрымаў узнагароду з рук міністра Івана Кубракова. «Гісторыя поспеху ў органах унутраных спраў», — вясной хваліла яго раёнка. Але неўзабаве Кухарава чакала крутое піке — цяпер ён у СІЗА па сур'ёзным карупцыйным абвінавачанні.
Аляксандру Кухараву 44 гады. Ягоны сын пайшоў па шляху бацькі і вучыцца на трэцім курсе Магілёўскага інстытута МУС.
У інтэрв'ю клімавіцкай раённай газеце «Родная ніва» Кухараў распавядаў, што ўсё жыццё марыў працаваць у міліцыі. Пасля школы пайшоў у армію, а пасля паступіў у Магілёўскую школу міліцыі.
Кухараў прыйшоў на пасаду ўчастковага ў 2002 годзе, у 2009 атрымаў пасаду аперупаўнаважанага. Працаваў у групе наркакантролю і супрацьдзеяння гандлю людзьмі, дайшоў там да старшага аперупаўнаважанага і атрымаў званне маёра.
З 2019 па 2022 працаваў у суседнім Крычаве начальнікам аддзелення крымінальнага вышуку.
А ўрэшце вярнуўся ў Клімавічы намеснікам начальніка РАУС. Кухараў узначальваў у раёне крымінальную міліцыю.
Па выніках працы ў 2023 ён атрымаў падзяку ад Кубракова з фармулёўкай за ўмелыя і прафесійна граматныя дзеянні, ініцыяву, праяўленыя пры выкананні службовых задач.
«Змагацца са злачыннасцю — наша праца. Усялякае здаралася, але думка пра тое, каб змяніць род дзейнасці ні разу не прыходзіла. Калектыў у нас згуртаваны, мы зладжана выконваем пастаўленыя задачы», — хваліўся Кухараў у інтэрв'ю раённай газеце.
Невядома, калі канкрэтна Кухарава затрымалі. Апошняя публічная згадка яго імені зафіксаваная ў сакавіку 2024 года. Неўзабаве ягонае імя знікла з сайта Клімавіцкага райвыканкама — цяпер месца кіраўніка крымінальнай міліцыі вакантнае.
Аляксандра Кухарава пачынаюць судзіць 9 снежня 2024 года ў Хоцімскім раённым судзе. Гэта звычайная практыка, калі працэсы над раённымі начальнікамі адбываюцца ў суседніх рэгіёнах — каб зменшыць імавернасць карупцыі пры вынясенні прысуду.
Кухарава абвінавачваюць па трэцяй, самай цяжкай, частцы артыкулу 430 КК — «хабар у асабліва буйным памеры або атрыманы асобай, якая займае адказнае становішча».
Аляксандру Кухараву пагражае ад пяці да пятнаццаці гадоў са штрафам і пазбаўленнем права займаць пэўныя пасады.
«Наша Нiва» — бастыён беларушчыны
ПАДТРЫМАЦЬ
Каментары