Беларусь шукае работнікаў у В'етнаме. Вось чаму пакуль нічога не атрымалася
Беларускія ўлады адчуваюць недахоп працоўнай сілы. Стварыць належныя ўмовы, каб вярнуліся эмігранты, не атрымліваецца. Таму вырашана шукаць танных работнікаў з краін трэцяга свету — адтуль, дзе сярэдні заробак ніжэйшы за беларускі.
«Белпол» падзяліўся з «Нашай Нівай» копіяй ліста пасольства Беларусі ў В'етнаме. З яго зместу можна зрабіць выснову, што ўрад усур'ёз азадачаны пытаннем пошуку рабочай сілы. Заданне шукаць яе за мяжой атрымалі і дыпламатычныя прадстаўніцтвы.
Так, у лісце згадваецца пратакол даручэнняў віцэ-прэм'ера Беларусі Анатоля Сівака ад 16 кастрычніка 2024 года. У адпаведнасці з ім пасольства паведамляе, што ў В'етнаме «ёсць пэўны аб'ём працоўнай сілы, для якой беларускі рынак працы патэнцыйна можа быць прывабным па ўзроўні аплаты».
Як тлумачыцца, у В'етнаме ўзровень беспрацоўя сярод моладзі складае 8%. Амаль паўтара мільёна чалавек узростам да 24 гадоў нідзе не працуюць і не вучацца. А сярэдні заробак у краіне складае $300 — істотна ніжэй, чым у Беларусі.
Аднак завабіць в'етнамцаў у Мінск усё адно пакуль не ўдалося.
Пасольства паведамляе, што ў чэрвені 2024 года кіраўніцтва «Камволя» спрабавала знайсці работнікаў і звярнулася па дапамогу да дыпламатаў. Тыя правялі некалькі сустрэч з рэкрутынгавымі агенцтвамі.
Колькі грошай захацелі в'етнамцы? $700 заробку на рукі на месяц (на перыяд выпрабавальнага тэрміну сышліся на $500). І гэта рабочым без вопыту працы па профілі і без ведання мовы. Калі б знайшоўся сярод рабочых чалавек, здольны камунікаваць па-руску ці па-англійску, то яму давялося б плаціць ужо па $1000.
Чаму столькі? Як тлумачыцца ў лісце, шмат хто з жыхароў краіны працуе за мяжой, перадусім у Японіі, Паўднёвай Карэі, Тайвані, Арабскіх Эміратах і Саудаўскай Аравіі. Там яны зарабляюць істотна вышэй. Таму пры ніжэйшым заробку, маўляў, немагчыма будзе знайсці ахвотных.
Пры гэтым, як вынікае з ліста, в'етнамцы гатовыя працаваць па 10 гадзін. Прапанова ўтрымлівала палажэнне аб «абавязковых 2 гадзінах звышурочных», уключна з працай у выходныя і святочныя дні з аплатай згодна з беларускім заканадаўствам.
Ахвотным прыехаць на працу працадаўца павінен быў бы аплаціць пералёт, а рэкрутынгаваму агенцтву — ганарар у памеры двухмесячнага заробку кожнага рабочага пасля выпрабавальнага тэрміну (па 1400 долараў).
Разглядзеўшы такую прапанову, кіраўніцтва «Камволю» вырашыла адмовіцца. Патрабуемы заробак аказаўся вышэйшым за той, на які разлічвалі на прадпрыемстве.
Згодна з інфармацыяй з раздзела вакансій сайта Камвольнага камбіната, заробак нізкакваліфікаваных работнікаў складае 900-950 рублёў, а аператара абсталявання — ад 1200 да 1400 рублёў. Самы вялікі заробак — 2000 рублёў — абяцаюць фарбоўшчыку.
Беларусы за такія грошы працуюць, а вось в'етнамцы не захацелі. Выглядае, што пошук гастарбайтараў працягваецца.
Каментары
"заробак нізкакваліфікаваных работнікаў складае 900-950 рублёў,"
...
гэта $300 ?