«Пераварот зялёнай паласы». Чаму новая ўлада змяніла дзяржаўны сцяг Сірыі

Апазіцыя, што прыйшла да ўлады ў Сірыі, змяняе дзяржаўную сімволіку. Замест чырвона-бела-чорнага сцяга з дзвюма зялёнымі зоркамі цяпер выкарыстоўваецца зялёна-бела-чорны сцяг з трыма чырвонымі зоркамі.

Новы сцяг не ўпершыню становіцца дзяржаўным. Ён ужо выконваў гэтую функцыю ў часы першай Сірыйскай Рэспублікі, якая была створана пад французскім мандатам у 1930 годзе. Сцяг пачаў выкарыстоўвацца ў 1932 годзе.

Колеры сцягу з'яўляюцца традыцыйнымі для сцягаў арабскіх краін. Зялёны сімвалізуе першы праведны Халіфат, белы — дынастыю Амеядаў, а чорны — Абасідаў. Першапачаткова тры чырвоныя зоркі прадстаўлялі правінцыі Алепа, Дамаск і Дэйр-эль-Зор. Аднак пасля далучэння Джабаль аль-Дуруза і Латакіі ў 1936 годзе значэнне зорак змянілася: першая зорка стала сімвалізаваць Алепа, Дамаск і Дэйр-эль-Зор, другая — Джабаль аль-Дуруз, а трэцяя — Латакію. Гэты сцяг захаваўся і пасля набыцця Сірыяй поўнай незалежнасці ў 1946 годзе.

Сцяг набыў важнае сімвалічнае значэнне. Ён нагадвае аб аб'яднанні сірыйцаў у змаганні за поўную незалежнасць. Гэты сцяг сірыйская апазіцыя стала выкарыстоўваць у 2011 годзе.

Што тычыцца сцяга, які выкарыстоўваўся пры праўленні Асадаў, то яго гісторыя пачынаецца ў 1958 годзе, калі Сірыя і Егіпет стварылі Аб'яднаную Арабскую Рэспубліку. Пры стварэнні гэтай сімволікі зялёную паласу замянілі на чырвоную, а тры чырвоныя зоркі — на дзве зялёныя. Яны сталі сімваламі Сірыі і Егіпта.

Павялічыць

Чырвона-бела-чорныя гарызантальныя палосы лічацца панарабскімі. У такой паслядоўнасці яны прысутнічаюць на дзяржаўных сцягах Судана, Емена, Егіпта, Ірака.

Сцяг быў дзяржаўным да распаду Аб'яднанай Арабскай Рэспублікі ў 1961 годзе. На некалькі гадоў (да 1963 года) Сірыйская Арабская Рэспубліка вярнулася да зялёна-бела-чорнага сцяга з трыма чырвонымі зоркамі.

У 1963 годзе, калі да ўлады ў Сірыі прыйшла Партыя арабскага сацыялістычнага адраджэння (БААС), вярнуўся чырвона-бела-чорны сцяг, але ўжо з трымя зялёнымі зоркамі. Зоркі сталі сімваламі лозунгу партыі — «Адзінства. Свабода. Сацыялізм».

У такім выглядзе сцяг праіснаваў да 1972 года, пакуль Сірыя разам з Егіптам і Лівіяй не ўвайшла ў Федэрацыю Арабскіх Рэспублік, і вярнуўся ў 1980 годзе, пасля яе распаду. Праўда, на ім засталіся дзве зялёныя зоркі, як і было першапачаткова ў 1958 годзе.

Павялічыць

Сцяг стаў сімвалам правячай партыі БААС і рэжыму Асада. З прыходам да ўлады БААС устанавіла ў краіне аднапартыйную сістэму, жорстка падаўляла любую форму нязгоды. У перыяд праўлення Хафеза Асада і яго сына Башара Асада ў краіне ўмацаваўся культ асобы, палітычныя апаненты былі адпраўлены за краты. Таму не дзіўна, што з прыходам да ўлады апазіцыі гэты сцяг быў заменены.

• 42
• 0
• 2
• 1
• 0
• 0
• 0
• 4