Прэм'ер Літвы: Словы Кандратовіча пра блізкасць беларускай нацыі гучаць дзіўна
Гінтаўтас Палуцкас пракаментаваў словы міністра ўнутраных спраў Літвы Уладзіслава Кандратовіча пра тое, што Беларусь — культурна найбліжэйшая краіна для Літвы.
Прэм'ер-міністр Літвы ацаніў выказванне кіраўніка МУС як дзіўнае, піша LRT.
«У сённяшнім кантэксце гэта гучыць даволі дзіўна, таму што рэжым Лукашэнкі, безумоўна, варожы Літве», — сказаў Палуцкас.
Пры гэтым кіраўнік літоўскага ўрада дадаў, што беларуская дыяспара ў краіне фармавалася многія дзесяцігоддзі.
«Калі ж паглядзець на гісторыю многіх дзесяцігоддзяў, адкуль у Літвы была дадатковая іміграцыя, як гэтыя дыяспары адаптаваліся да Літвы, то насамрэч гэта Украіна, Беларусь, і нас гэта не павінна моцна здзіўляць», — адзначыў Палуцкас.
Ён таксама заявіў, што іміграцыя ў Літву павінна кантралявацца. У краіне ўжо пражываюць 220 тысяч чалавек, якія прыбылі з-за мяжы, што складае 8% насельніцтва дзяржавы.
«Гэта сапраўды можа стаць выклікам, таму да гэтых пытанняў трэба падыходзіць сур'ёзна, улічваючы таксама геапалітычную сітуацыю. Аднак каментар міністра з'яўляецца часткай больш шырокага кантэксту», — адзначыў прэм'ер-міністр Літвы.
Кіраўнік МУС Уладзіслаў Кандратовіч раней назваў Беларусь культурна самай блізкай краінай для Літвы. Разам з тым міністр адзначыў неабходнасць улічваць і магчымыя рызыкі для бяспекі дзяржавы.
Цяпер чытаюць
«Ты ў нас у Беларусі!» — «Я маму тваю я*аў». Госцю з Алтая не спадабалася заўвага за кінуты ў цэнтры Мінска недакурак41
Каментары
«У сённяшнім кантэксце гэта гучыць даволі дзіўна, таму што рэжым Лукашэнкі, безумоўна, варожы Літве», — сказаў Палуцкас./
Ясна. Для спадара Кандратовіча культура гэта народ Беларусі і шматвяковая агульная гісторыя нашых народаў.
Для спадара Палуцкаса культура гэта рэжым Лукашэнкі.
Хочацца нагадаць спадару, у якога гісторыя пачалася ў 1994 годзе, што прарасейкі рэжым Лукашэнкі існуе ўсяго толькі 30 гадоў і хутка можа скончыцца.
А беларускі народ з нашай мовай і шматвяковай гісторыяй і культурай існуе шмат стагоддзяў. Нягледзячы на спробы Масквы і прарасейскіх сіл нас знішчыць.
Пасля падзення прарасейскага рэжыму Лукашэнкі, які душыць усё беларускае, знішчае беларускую архітэктуру, культуру, выдавецтвы, нацыянальную адукацыю, выціскае носьбітаў нацыянальнай культуры за мяжу, забараняе іх браць на працу, і гэтак далей, пасля падзення рэжыму Лукашэнкі беларуская культура, як кветка, з якой знялі цяжкі прадмет, пад якім яна задыхалася, хутка адужае і расквітнее.