Памятаеце, як Расія патрабавала ад Google ундыцыльёны? Цяпер штраф вырас да двух дуадыцыльёнаў
Сума патрабаванняў расійскіх тэлеканалаў расце, а ў судах вывучаюць новыя словы.
Сума, якую 17 расійскіх тэлеканалаў патрабуюць ад карпарацыі Google, вырасла да 1,8 дуадыцыльёна расійскіх рублёў.
Гэта сума назапасілася таму, што кампанія не аднавіла акаўнты расійскіх прапагандысцкіх СМІ на YouTube, піша РБК.
Дуадыцыліён — гэта адзінка з 39 нулямі. Сума, якую ў Расіі патрабуюць ад Google, даўно значна перавышае суму ўсіх грошай на планеце.
Пасля пачатку поўнамаштабнай вайны YouTube выдаліў каналы расійскіх прапагандысцкіх СМІ. Пасля гэтага 17 тэлеканалаў, сярод якіх «Расія», НТВ, «Першы канал» i іншыя, падалі іск на карпарацыю.
Расійскі суд абавязаў Google аднавіць акаўнты і ўсталяваў прагрэсуючы штраф. Кожны дзень пратэрміноўкі павялічвае суму на 100 тысяч расійскіх рублёў (крыху больш за тысячу долараў), кожны тыдзень сума падвойваецца. Ніякіх абмежаванняў на суму канчатковага штрафу няма.
У кастрычніку 2024 года сума штрафу дасягнула двух ундыцыльёнаў рублёў — гэта адзінка з 36 нулямі. Два ўндыцыльёны гэта прыблізна 20 дыцыльёнаў даляраў, то-бок адзінак з 33 нулямі. Пры гэтым сукупнае чыстае сусветнае багацце ацэньваецца ў 477 трыльёнаў даляраў (12 нулёў), а капіталізацыя Alphabet, мацярынскай кампаніі Google, складае 2,4 трыльёна.
Цяпер чытаюць
Міжнародны крымінальны суд пачаў расследаванне злачынстваў, здзейсненых рэжымам Лукашэнкі20
Каментары