15 лютага пасля працяглай хваробы памёр беларускі краязнавец, настаўнік, сябра некалькіх грамадскіх арганізацый з горада Дзятлава Гродзенскай вобласці Валеры Петрыкевіч, паведамляе радыё «Рацыя».
Валеры Петрыкевіч нарадзіўся 6 верасня 1946 года ў мястэчку Любча на Наваградчыне. Значная частка яго жыцця была звязаная з мястэчкам Валеўка, дзе працаваў ягоны бацька Міхаіл Петрыкевіч — краязнавец, які стварыў там знакаміты музей.
Большая частка біяграфіі Валерыя Петрыкевіча непарыўна звязаная з Дзятлаўскім раёнам, дзе ён настаўнічаў і рупліва працаваў на ніве беларушчыны. Настаўнік фізкультуры (а Петрыкевіч быў у маладосці моцным спартоўцам па розных відах) выхаваў не адно пакаленне беларускіх патрыётаў у сваім рэгіёне. Менавіта па яго ініцыятыве і чынным удзеле былі ўсталяваныя розныя памятныя знакі на Дзятлаўшчыне — на радзіме Ігната Дварчаніна, Вячаслава Адамчыка ды ў іншых адметных месцах.
Валеры Петрыкевіч быў актыўным сябрам Таварыства беларускай мовы, Асветніцкага грамадскага аб’яднання «Фонд імя Льва Сапегі», краязнаўчых суполак, цесна супрацоўнічаў з беларускімі пісьменнікамі.
Менавіта ён заснаваў штогадовы абласны літаратурна-музычны фэст у вёсцы Зачэпічы. А вось апошнюю задумку, каб паставіць у Дзятлаве помнік Канстанціну Астрожскаму, улады здзейсніць не далі…
Цяпер чытаюць
На «Гродна Азоце» скончыў жыццё самагубствам намеснік начальніка цэха1
На «Гродна Азоце» скончыў жыццё самагубствам намеснік начальніка цэха
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары