Беларускія ўлады засакрэцілі звесткі пра ўладальнікаў сеткі рэстаранаў хуткага харчавання «Мак.Бай» (ex-Mcdonald’s) у Адзіным дзяржаўным рэгістры юрыдычных асоб і індывідуальных прадпрымальнікаў (АДР), піша «Бюро».
У чэрвені 2024 года ў яе змяніўся ўладальнік. Сетка рэстаранаў стала належаць праз кампанію «Кволіці Фуд» дваім беларусам — Аляксею Саўчуку і Вікторыі Данько. Саўчук валодае малакаперапрацоўчымі заводамі ў Беларусі і Расіі і ўваходзіць у топ-30 паспяховых беларускіх бізнэсоўцаў.
Немагчыма дакладна сказаць, калі дадзеныя пра ўладальнікаў былі схаваныя, але дзесьці паміж 10 чэрвеня 2024 года і 13 лютага 2025 года яны зніклі з рэестра як у кампаніі «Мак.Бай», так і ў «Кволіці Фуд».
Раней беларуская дзяржава ў асобе Дзяржкаммаёмасці праз суд змагла забраць сабе сетку рэстаранаў хуткага абслугоўвання ў папярэдніх уладальнікаў — сінгапурскай фірмы KSB Victory Restaurants PTE.LTD. Ёю ў сваю чаргу валодаў казахстанскі бізнэсовец Кайрат Баранбаеў і дырэктарка беларускай сеткі рэстаранаў Mcdonald’s Вікторыя Данько.
Судовыя рашэнні па гэтай справе былі таксама засакрэчаныя. У Банку дадзеных судовых пастаноў па гэтай справе захоўваюцца толькі файлы са шматкроп’ем. Уся рэзалютыўная частка схаваная ад грамадскасці, хаця рашэнні па эканамічных справах раней публікаваліся ў адкрытым доступе.
Гэта не першы выпадак, калі ўлады засакрэчваюць інфармацыю пра ўладальнікаў кампаній. Раней Belpol расказваў пра кампанію «Усход Пропертыз Менеджмент», якая валодае адной з рэзідэнцый Аляксандра Лукашэнкі на Заслаўскім вадасховішчы і атрымлівае грошы ад структур братоў Карычаў. Дык вось у гэтай кампаніі таксама выдаленыя звесткі пра ўладальнікаў з АДР.
Але і гэта не ўсё. «Бюро» знайшло інфармацыю, што адно з прадпрыемстваў «кашалька» Лукашэнкі — Аляксея Алексіна — пастаўляе ў новы «Мак.Бай» сваю прадукцыю. У ліпені 2023 года Міністэрства антыманапольнага рэгулявання і гандлю паведамляла, што сетка рэстаранаў «пераходзіць на айчынныя прадукты». Выявілася, што кампанія «Велес-Міт», якая належыць сям’і Аляксея Алексіна, — пастаўшчык бургерных катлет і вяндліны для сеткі рэстаранаў.
Раней «Наша Ніва» са спасылкай на свае крыніцы паведамляла, што прыглядваць за «Мак.Бай» паставілі якраз блізкага да Аляксандра Лукашэнкі бізнэсоўца — Аляксея Алексіна.
Аднак гэта не адзіныя буйныя беларускія пастаўшчыкі ў новай-старой сетцы. Таксама беларускую прадукцыю ў рэстараны «Мак.Бай» пастаўляе «Савушкаў прадукт» (малочныя прадукты), «Сервалюкс» (прадукты з курыцы) і «Салігорская птушкафабрыка».
Каментары