У судзе Ленінскага раёна Брэста 12 сакавіка паводле «народнага» артыкула 342 КК (групавое парушэнне грамадскага парадку) судзілі 37-гадовага Сяргея Барысавіча Чаберака. Журналісты BGmedia выказалі здагадку, што гэта даволі вядомы ў Беларусі лёгкаатлет, майстар спорту міжнароднага класа Сяргей Чаберак. Цяпер ініцыятыва Belpol пацвердзіла выданню, што судзілі сапраўды яго.
Што вядома пра Сяргея Чаберака
Сяргей Чаберак — трэнер-выкладчык па спорце вышэйшай катэгорыі. Майстар спорту міжнароднага класа Рэспублікі Беларусь.
Ён віцэ-чэмпіён Еўропы па кросе на дыстанцыі 6 км, 26-разовы пераможца чэмпіянатаў і першынстваў Беларусі па лёгкай атлетыцы. Неаднаразовы ўдзельнік чэмпіянатаў свету па кросе, кубкаў і чэмпіянатаў Еўропы па лёгкай атлетыцы. Фіналіст чэмпіянату Еўропы па лёгкай атлетыцы ў памяшканні на дыстанцыі 3000 метраў, моладзевага чэмпіянату Еўропы па лёгкай атлетыцы на дыстанцыі 5000 метраў.
У 2006 годзе ён атрымаў званне «Спартсмен года». У 2011 годзе паказаў найлепшы вынік за ўсю гісторыю суверэннай Беларусі на дыстанцыі 3000 і 5000 метраў.
У чэрвені 2019 года Сяргей Чаберак у інтэрв'ю BGmedia расказаў, што ў спорце з 5-га класа. Ён пачынаў са школьнай секцыі лёгкай атлетыкі, затым у яго з'явіўся прафесійны трэнер, пазней перайшоў у прафесійную лігу і займаўся ў школе вышэйшага спартыўнага майстэрства.
Сяргей Чаберак вёў актыўнае жыццё ў Брэсце, удзельнічаў у спартыўных мерапрыемствах. Напрыклад, у штогадовых дабрачынных забегах «Бягом ад дэпрэсіі», якія арганізоўвалі ў падтрымку «Брэсцкага клубнага дома» — сацыяльнай службы для людзей з псіхічнымі разладамі. У 2021 годзе ў мерапрыемстве паўдзельнічала рэкордная колькасць чалавек.
Журналісты BGmedia знайшлі сацсеткі Сяргея Чаберака. Ягоная старонка ў інстаграме не абнаўляецца з канца лістапада 2024 года. Як мяркуецца, тады яго і затрымалі.
8 лістапада мужчына ездзіў у Еўропу адзначаць свой 37-ы дзень нараджэння, які быў 7 лістапада. У сацсетках Сяргея Чабярака пазначана, што ён працуе трэнерам у школе бегу I-RUN.
Таксама журналісты BGmedia знайшлі старонку ў інстаграме Ірыны Баханоўскай, якая таксама працуе трэнеркай у школе бегу I-RUN. Мяркуючы па яе пастах, яны з Сяргеем Чаберакам разам выхоўваюць 10-гадовага сына Максіма.
Суд над Сяргеем Чаберакам пачаўся ў сераду, 12 сакавіка, у судзе Ленінскага раёна Берасця. Яго і Дзмітрыя Юр'евіча Ляміна абвінавачвалі паводле ч. 1 арт. 342 КК (групавое парушэнне грамадскага парадку). Суддзёй быў Дзмітрый Шурын. Такія звесткі вынікаюць з раскладу суда, пісала «Берасцейская вясна».
Ірына Баханоўская 15 сакавіка апублікавала ў інстаграме відэа, на якім Сяргей Чаберак шчаслівы выходзіць з Дома правасуддзя ў Берасці, а яго сустракаюць сям'я і сябры. Яна напісала ў допісе, што гэта здарылася 13 сакавіка.
Можна меркаваць, што Сяргею Чабераку за ўдзел у пратэстах прысудзілі «хатнюю хімію» або «хімію», раз яго адпусцілі на волю пасля вынясення прысуду.
Стаў вядомы прысуд мытніку Скубілаву, абвінавачанаму ў «здрадзе дзяржаве»
У Магілёве пяцярых чалавек асудзілі за падпал кіёска ў жніўні 2020 года
Гомельская журналістка, якая працавала ў Беларусі да апошняга, з’ехала з Беларусі праз размову ў КДБ
Будаўніка, які доўгі час жыў у Расіі, асудзілі ў Віцебску за палітыку. А цяпер абвясцілі «тэрарыстам»
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа26
Каментары