Трамп заявіў пра стварэнне амерыканскага знішчальніка новага пакалення
Прэзідэнт ЗША Дональд Трамп заявіў на прэс-канферэнцыі, праведзенай у Белым доме разам з кіраўніком Пентагона Пітам Хегсетам, што ў ЗША выпрабоўваецца новы амерыканскі знішчальнік шостага пакалення, які будзе называцца F-47.
Трамп расказаў, што такія знішчальнікі будзе вырабляць кампанія Boeing. Па яго словах, эксперыментальная версія F-47 «ужо лётае пяць гадоў», а канчатковая будзе пераўзыходзіць усе астатнія самалёты.
«F-47 будзе самым дасканалым, самым магутным і смертаносным самалётам з калі-небудзь пабудаваных. Ён будзе абсталяваны самай сучаснай тэхналогіяй утоенасці. Ён амаль непрыкметны і валодае беспрэцэдэнтнай магутнасцю. Ён мае найбольшую магутнасць сярод усіх рэактыўных самалётаў такога тыпу, калі-небудзь створаных», — заявіў прэзідэнт ЗША.
Ён таксама падкрэсліў, што «ворагі Амерыкі ніколі не ўбачаць яго», і дадаў, што ЗША могуць прадаваць спрошчаную версію гэтага самалёта краінам Еўрасаюза.
«Ніколі не было нічога нават блізкага да яго, ад хуткасці да манеўранасці, да магчымай карыснай нагрузкі. І гэтая распрацоўка вялася на працягу доўгага перыяду часу. Пасля суровай і моцнай канкурэнцыі паміж некаторымі вядучымі амерыканскімі аэракасмічнымі кампаніямі ВПС маюць намер прысудзіць Boeing кантракт на платформу для дамінавання ў паветры наступнага пакалення», — адзначыў Трамп.
Кантракт з Boeing на суму больш за 20 мільярдаў даляраў ахоплівае этап інжынернай і вытворчай распрацоўкі.
Міністр абароны ЗША Піт Хегсет, у сваю чаргу, заявіў, што Амерыка будзе мець «пакаленне будучага паветранага панавання дзякуючы гэтаму знішчальніку шостага пакалення».
Выданне The New York Times выказала меркаванне, што нумар 47 (які Трамп у сваёй прамове назваў «прыгожай лічбай») «відавочна абраны ў памяць пра яго прэзідэнцтва», бо Трамп у свой другі тэрмін стаў 47-м па ліку прэзідэнтам ЗША.
Цяпер чытаюць
Сотні рублёў, каб эфектна даведацца пол будучага дзіцяці: беларусы робяць усё больш маштабныя гендар-паці2
Каментары