Запланаваны ў Вільні канцэрт Крысціны Арбакайце выклікаў абурэнне ў сацсетках. Умяшаўся нават прэм’ер краіны
«Мы вязём у Літву «заслужаных артыстаў РФ» і не бачым ніякіх праблем», гэта чарговая спроба заразіць нашу культуру «цвіллю рускага свету» — абураюцца літоўцы.
Запланаваны на 31 мая ў Вільні канцэрт расійскай спявачкі Крысціны Арбакайце выклікаў хвалю абурэння ў сацыяльных сетках. Карыстальнікі выказваюць незадаволенасць тым, што ў Літву запрашаюць артыстку, якая атрымала званне «заслужанай артысткі Расійскай Федэрацыі» і не асудзіла агрэсію Расіі супраць Украіны.
Крысціна Арбакайце, дачка вядомай расійскай спявачкі Алы Пугачовай і літоўскага артыста цырка Міколаса Арбакаса, у 2022 годзе атрымала літоўскае грамадзянства як унучка грамадзян Літвы. Аднак яе дзейнасць пасля пачатку вайны ва Украіне выклікае спрэчкі.
У кастрычніку 2022 года яна выступала на прыватным мерапрыемстве ў Ялце, а ў сакавіку 2024 года падарыла 50 білетаў на свой канцэрт у Санкт-Пецярбургу сем'ям расійскіх вайскоўцаў.
Прэм'ер-міністр Літвы Гінтаўтас Палуцкас вымушаны нават быў пракаментаваць сітуацыю. Ён заклікаў арганізатараў канцэрта запытаць у Арбакайце пра яе пазіцыю адносна вайны ва Украіне і агучыць адказ грамадскасці. Прэм'ер падкрэсліў, што важна ведаць, як артыстка ставіцца да бягучых падзей, асабліва ўлічваючы яе ранейшыя сувязі з расійскімі ўладамі.
Эксперт па абароне і бяспецы Аўрымас Навіс у каментары LRT адзначыў, што правядзенне такіх канцэртаў можа быць часткай інфармацыйных і псіхалагічных аперацый Крамля, накіраваных на распаўсюджванне «рускага свету» і ўплыў на культуру іншых краін. Ён лічыць, што гэта спроба паказаць Літву як частку расійскай культурнай прасторы, што можа мець негатыўныя наступствы для нацыянальнай бяспекі.
Арганізатары канцэрта пакуль не далі афіцыйных каментарыяў адносна сітуацыі.
Цяпер чытаюць
«У такую ж галечу, ды яшчэ і халодную, пакістанцы не паедуць». Беларус пяць тыдняў правёў у Пакістане — вось што яго ўразіла33
Каментары
[Зрэдагавана]