Зяленскі заявіў, што Украіна гатова купіць 10 комплексаў Patriot за 15 мільярдаў долараў, але ЗША не прадаюць
Прэзідэнт Уладзімір Зяленскі заявіў аб гатоўнасці набыць у ЗША дзесяць зенітных комплексаў Patriot за 15 мільярдаў долараў з фінансавай дапамогай еўрапейскіх партнёраў.
Зяленскі ў інтэрв'ю CBS заявіў, што Украіна так і не атрымала дадатковыя сістэмы Patriot, якія абяцалі на саміце NATO ў Вашынгтоне.
«Я паважаю выбар ЗША, але калі ЗША не далі нам такія сістэмы, не прадалі іх, мы гатовыя да любога фармату, пытанне не ў грошах», — сказаў ён.
Паводле яго слоў, некаторыя еўрапейскія партнёры гатовы фінансава дапамагчы ў набыцці гэтых сістэм.
«Але ЗША кажуць, што сёння няма магчымасці. У гэты ж час яны прадаюць такія сістэмы, напрыклад, Ізраілю. Я не кажу, што яны не патрэбныя Ізраілю, але калі мы партнёры, няўжо мы не можам знайсці магчымасць абараніць Украіну?» — сказаў ён.
Паводле яго слоў, у размове з прэзідэнтам Дональдам Трампам ён прапанаваў розныя варыянты.
«Ёсць сістэма Patriot, і ў вас іх шмат, і ў вас ёсць вытворчасць. Ёсць некалькі крокаў, як абараніць Украіну.
Крок першы: адна сістэма, якая каштуе паўтара мільярда долараў, мы гатовы купіць мінімум дзесяць сістэм, каб закрыць нейкія гарады, толькі грамадзянскія, цэнтры гарадоў, дзе натоўпы людзей. Гэта 15 мільярдаў. Мы гатовыя заплаціць гэтыя 15 мільярдаў. Мы знойдзем гэтыя грошы, і мы заплацім усё», — сказаў Зяленскі.
Другі варыянт, паводле яго слоў, — гэта ліцэнзіі на вытворчасць сістэм і звязаных з імі ракет, і ён прасіў аб гэтым цяперашні і папярэднія адміністрацыі ЗША.
Ён таксама назваў краіны Блізкага Усходу, Еўропы і Азіі, дзе разгорнутыя амерыканскія сістэмы Patriot і дзе не вядуцца баявыя дзеянні, якія можна было б перанесці ва Украіну.
«Мы былі гатовыя ўзяць іх нават у арэнду. Ёсць шмат фарматаў, як гэта забяспечыць. Патрэбна жаданне», — сказаў Зяленскі.
Ніякага паразумення з ЗША, як вынікае з інтэрв'ю, пакуль няма.
Каментары
Ды яшчэ везці невядома колькі часу праз акеан. Ды яшчэ сварыцца з Амерыкай. Маўляў усе беды Украіны з-за яе.
Ці не прасцей, каб еўрапейскія партнёры далі Украіне свае зенітныя комплексы? І везці бліжэй, і хутчэй.
Каму Пуцін не адобрыў? Байдэну?