«Канкурэнцыя вельмі жорсткая». За апошнія гады некалькі кітайскіх навукоўцаў, якія займаліся ШІ, памерлі ў маладым узросце
За апошнія гады некалькі кітайскіх навукоўцаў, якія ўнеслі значны ўклад у развіццё штучнага інтэлекту ў ваеннай і медыцынскай галінах, памерлі ў раннім узросце па да канца не зразумелых прычынах, піша выданне South China Morning Post.
Паводле даных газеты, у чэрвені 2022 года ва ўзросце 45 гадоў памёр эксперт па камп'ютарным зроку Сун Цзянь, былы галоўны навуковы супрацоўнік кітайскай кампаніі Megvii Technology, якая займаецца распрацоўкай праграмнага забеспячэння для распазнавання малюнкаў і глыбокага навучання.
Таксама два трагічныя інцыдэнты адбыліся ў 2023 годзе. Першы з іх тычыцца Фэн Янхэ, спецыяліста па штучным інтэлекце ў сферы абароны, які загінуў ва ўзросце 38 гадоў па дарозе на выкананне задання, як пазначана ў афіцыйным некралогу. Ягоныя даследаванні былі звязаны з вайсковымі гульнямі і планаваннем з дапамогай тэхналогій ШІ.
Пазней стала вядома пра гібель яшчэ аднаго даследчыка — Тан Сяоу, заснавальніка тэхнагіганта SenseTime, які спецыялізаваўся на распрацоўцы мадэляў распазнання твараў. Ён памёр ва ўзросце 55 гадоў, і, як удакладняецца ў некралогу, прычынай яго смерці стала хвароба, характар якой не ўдакладняецца.
Апошні выпадак, пра які паведамляе газета, адбыўся ў 2024 годзе. Саракагадовы Хэ Чжы, сузаснавальнік і галоўны дырэктар па інавацыях кампаніі Yidu Tech, якая на аснове вялікіх баз даных і тэхналогій ШІ распрацоўвае рашэнні ў галіне аховы здароўя, памёр ва ўзросце 40 гадоў ад прыступу горнай хваробы і няўдалай спробы выратаваць яго жыццё.
«Ранняя смерць гэтых экспертаў — у выніку няшчасных выпадкаў або хвароб — выклікала занепакоенасць з нагоды асабістай бяспекі спецыялістаў галіны і напружанага даследчага асяроддзя, у якім яны працуюць», — сказана ў матэрыяле.
Гэтыя выпадкі выклікалі дыскусіі аб празмерных нагрузках у кітайскай IT-сферы. Нягледзячы на высокія заробкі і сацыяльны статус, даследчыкі працуюць ва ўмовах жорсткай канкурэнцыі і пастаяннага ціску.
Кітай, які імкнецца абагнаць ЗША ў гонцы ШІ-тэхналогій, змушае навукоўцаў працаваць на мяжы магчымасцяў.
«Індустрыя развіваецца занадта хутка, а канкурэнцыя вельмі жорсткая», — заявіў выданню кітайскі IT-эксперт Лю Шаашань.
Каментары