«Kankurencyja vielmi žorstkaja». Za apošnija hady niekalki kitajskich navukoŭcaŭ, jakija zajmalisia ŠI, pamierli ŭ maładym uzroście
Za apošnija hady niekalki kitajskich navukoŭcaŭ, jakija ŭnieśli značny ŭkład u raźvićcio štučnaha intelektu ŭ vajennaj i miedycynskaj halinach, pamierli ŭ rańnim uzroście pa da kanca nie zrazumiełych pryčynach, piša vydańnie South China Morning Post.
Pavodle danych haziety, u červieni 2022 hoda va ŭzroście 45 hadoŭ pamior ekśpiert pa kampjutarnym zroku Sun Cziań, były hałoŭny navukovy supracoŭnik kitajskaj kampanii Megvii Technology, jakaja zajmajecca raspracoŭkaj prahramnaha zabieśpiačeńnia dla raspaznavańnia malunkaŭ i hłybokaha navučańnia.
Taksama dva trahičnyja incydenty adbylisia ŭ 2023 hodzie. Pieršy ź ich tyčycca Fen Janche, śpiecyjalista pa štučnym intelekcie ŭ śfiery abarony, jaki zahinuŭ va ŭzroście 38 hadoŭ pa darozie na vykanańnie zadańnia, jak paznačana ŭ aficyjnym niekrałohu. Jahonyja daśledavańni byli źviazany z vajskovymi hulniami i płanavańniem z dapamohaj technałohij ŠI.
Paźniej stała viadoma pra hibiel jašče adnaho daśledčyka — Tan Siaou, zasnavalnika technahihanta SenseTime, jaki śpiecyjalizavaŭsia na raspracoŭcy madelaŭ raspaznańnia tvaraŭ. Jon pamior va ŭzroście 55 hadoŭ, i, jak udakładniajecca ŭ niekrałohu, pryčynaj jaho śmierci stała chvaroba, charaktar jakoj nie ŭdakładniajecca.
Apošni vypadak, pra jaki paviedamlaje hazieta, adbyŭsia ŭ 2024 hodzie. Sarakahadovy Che Čžy, suzasnavalnik i hałoŭny dyrektar pa inavacyjach kampanii Yidu Tech, jakaja na asnovie vialikich baz danych i technałohij ŠI raspracoŭvaje rašeńni ŭ halinie achovy zdaroŭja, pamior va ŭzroście 40 hadoŭ ad prystupu hornaj chvaroby i niaŭdałaj sproby vyratavać jaho žyćcio.
«Rańniaja śmierć hetych ekśpiertaŭ — u vyniku niaščasnych vypadkaŭ abo chvarob — vyklikała zaniepakojenaść z nahody asabistaj biaśpieki śpiecyjalistaŭ haliny i napružanaha daśledčaha asiarodździa, u jakim jany pracujuć», — skazana ŭ materyjale.
Hetyja vypadki vyklikali dyskusii ab praźmiernych nahruzkach u kitajskaj IT-śfiery. Niahledziačy na vysokija zarobki i sacyjalny status, daśledčyki pracujuć va ŭmovach žorstkaj kankurencyi i pastajannaha cisku.
Kitaj, jaki imkniecca abahnać ZŠA ŭ honcy ŠI-technałohij, zmušaje navukoŭcaŭ pracavać na miažy mahčymaściaŭ.
«Industryja raźvivajecca zanadta chutka, a kankurencyja vielmi žorstkaja», — zajaviŭ vydańniu kitajski IT-ekśpiert Lu Šaašań.
Čamu Cichanoŭskaja nie pajechała na pachavańnie Papy?23
Kamientary