«Яны чамусьці думаюць, што іх зараз згвалцяць». Прапаганда кінулася тушыць абурэнне беларусаў 150 тысячамі пакістанцаў
Днямі Аляксандр Лукашэнка заявіў, што Беларусь гатовая прыняць 150 тысяч працоўных мігрантаў з Пакістана. Гэта лічба — амаль як Баранавічы — відаць, моцна ўзрушыла грамадства. Хоць у краіне забаронена выказваць хоць якую нездаволенасць, але прапагандысты з такой энергіяй сталі бэсціць тых, хто супраць гэтага, што многае становіцца зразумелым.
Прапагандысты Азаронак і Васкрасенскі на стрыме патлумачылі беларусам, чаму пакістанцы ў Беларусі — гэта не тое самае, што ў Еўропе.
«Спрабуюць зноў укінуць нацыянальную нянавісць <> Збеглыя, вядома ж, і іншыя інфармацыйныя правакатары пачалі разгойдваць гэтую тэму. Каго знайшлі, якую мэтавую групу? Дзяўчынкі — падлеткі.
Яны чамусьці ўсе думаюць, што іх цяпер згвалцяць. Яны чамусьці думаюць, што ў нас пачнуцца цяпер нейкія нормы шарыяту. І пачаліся, прабачце, ну не масавыя, але маштабныя праявы гэтага ў сацсетках».
Азаронак лічыць, што ў краіне «штучна пачынаюць нагнятаць нацыянальную нянавісць».
Ён нагадаў, што за распальванне міжнацыянальнай варажнечы існуе крымінальная адказнасць.
«Бацькі, растлумачце гэта сваім дзецям, калі яны да гэтага часу гэтага не разумеюць», — сказаў ён.
Пасля пагроз Крымінальным кодэксам, Азаронак пачаў супакойваць беларусаў, маўляў, чаго баяцца, у нас жа ўся краіна пад прэсам сілавікоў.
«Вы што, забыліся, што ў нас тут наогул-та рэжым? У нас тут рэжым — паліцэйскі яго называюць, вайсковы рэжым, сілавы рэжым», — усё, маўляў, пад кантролем.
Азаронак згадаў, што калі будаваліся Смалявічы, «апазіцыянеры верашчалі», што цяпер сюды прыедуць мільёны кітайцаў, і ў нас ўся Мінская вобласць будзе гаварыць па-кітайску.
«Уся будзе жоўтая. Давайце, дзяўчаты, прыдумляйце кітайскія імёны сваім дзеткам, таму што гэта будзе крах і жахі, Беларусь заселяць адны кітайцы, у нас тут будзе камунізм і партрэты Маа Цзэдуна. Ну і дзе?» — сказаў Азаронак.
Ён патлумачыў, што ў Беларусі гэта працуе не так, як у Еўропе, «дзе сапраўды бардак з мігрантамі, дзе сапраўды гвалтуюць жанчын, і потым паліцыя кажа: «Самі вінаватыя, не хадзіце ноччу».
«Яны [пакістанцы] да нас не жыць едуць», а працаваць, «атрымаць грошы і зляцець», тлумачыць Азаронак.
«Прыляцелі — у аўтобус — інтэрнат. У інтэрнаце — ахова, у кожнага прадпрыемства ёсць інтэрнат, — намаляваў суровыя будні пакістанскіх мігрантаў Азаронак. — Адпраўляюць арганізавана на працу — адпрацавалі. Мала перасякаемся з мясцовым насельніцтвам, без сем'яў, як часта ў Расійскай Федэрацыі, напрыклад, гэта адбываецца, без прэтэнзій на тое, што тут нейкія анклавы нацыянальныя створаць. Гэтага нічога не будзе. Ну вось гэта трэба тлумачыць? Ну, вядома, дзяўчынкам-падлеткам, можа быць, і трэба тлумачыць. Яны ўжо там, прабачце, амазонкі — рэканкісту пачынаюць супраць джыхаду. Ужо паказваюць, як яны берцы купляюць і пярцовыя балончыкі».
Азаронак дадаў, што пакістанцы з’явяцца ў краіне не ад добрага жыцця ў Беларусі.
«Выбачайце, калі ласка, а гэта што, ад добрага жыцця нам спатрэбілася? А можа дзяцей трэба нараджаць? — папракнуў беларусаў Азаронак. — Калі груба казаць, а можа нам так трэба націснуць (ніхто не будзе так рабіць) так на бізнэс, каб усе інстаблогеркі, інфлюэнсеркі і іншыя пайшлі ў легпрам працаваць?»
Азаронак дадаў, што гэта яго такія эмацыйныя думкі, але, сцвярджае ён, «гэта працэс, які ёсць ва ўсіх развітых краінах».
«І ўсё залежыць ад таго, як улада з гэтым будзе разбірацца, і як улада гэта ўсё будзе арганізоўваць. Наша ўлада гэта арганізуе абсалютна нармальна, я запэўніваю», — запэўніў ён.
-
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
-
«Байсол» абвінаваціў Стрыжака ў адмове перадаць кантроль над юрыдычнымі асобамі ў Польшчы і ЗША
-
Дэпартаваным палітвязням, каб абжыцца на новым месцы, зараз трэба простыя рэчы: вопратка, посуд, пасцель — збор
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам13
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2020
Каментары