Падчас выступу ў Батумі 22 красавіка на тэму таго, наколькі беларусам бяспечна цяпер знаходзіцца ў Грузіі, адвакат, былы кандыдат у прэзідэнты Беларусі Алесь Міхалевіч прадэманстраваў аўдыторыі пашпарт Новай Беларусі і падкрэсліў, што гэта не ўзор, а ягоны асабісты асобнік, піша «Белсат».
За пашпарт пад нумарам 321 Алесь Міхалевіч заплаціў 97 еўра. Кажа, што ў дакуменце ёсць біяметрычныя даныя і ён сапраўды зроблены паводле ўсіх стандартаў ЕС.
У пашпарце стаіць код краіны BLS. Ці прызнаны ён афіцыйна — юрыст не ведае.
«Цяпер зрабіць пашпарт Новай Беларусі можна толькі ў Вільні, але думаю, дастаткова хутка будзе цэнтр у Варшаве. Я вельмі ўдзячны Кабінету, што ў мяне ёсць гэты пашпарт. Я лічу, што гэта крута», — зазначае Міхалевіч.
Адвакат прызнае, што пакуль што пашпарт не мае практычнага прымянення.
Пры гэтым Міхалевіч лічыць, што праект пашпарту, а таксама такія інстытуцыі, як Каардынацыйная Рада, Аб’яднаны пераходны кабінет, прэзідэнт-элект — тое, што можна моцна сыграць на руку беларусам, калі ў Беларусі здарыцца чарговы нацыянальны ўздым.
«Шмат хто выступаў супраць КР, маўляў, яе трэба было абіраць у 2020 годзе, і калі мы не зрабілі тады, не трэба было і пачынаць. Але мы не можам пераскочыць некаторыя рэчы. У 2020 годзе ў нас не было на гэта рэсурсу і магчымасцяў. А цяпер ёсць. І калі будзе чарговы ўздым у Беларусі — а ён будзе — у нас будуць адпрацаваныя інстытуцыі, у тым ліку з выдачай пашпартоў. У гэтым сэнсе мы сёння наперадзе ўсёй планеты, бо тое, што мы зрабілі з наяўнасцю прэзідэнта-электа, КР, якая мае хоць слабенькую, але легітымнасць, тое, што ў нас ёсць Кабінет і пашпарт — гэта крута», — кажа Міхалевіч.
Юрыст называе набыццё пашпарту Новай Беларусі сваёй «лепшай інвестыцыяй» і заклікае не абясцэньваць высілкі беларусаў па стварэнні гэтага дакумента.
Цяпер чытаюць
Міністр сувязі: Абмежаванні мабільнага інтэрнэту закрануць 1,7 мільёна беларусаў9
Каментары