Зняволены крытык Пуціна, які дакладна прадказваў ход ваенных дзеянняў у 2022 і 2024 гадах, лічыць, што летні наступ украінскай арміі можа скончыцца паразай Расіі.
Палкоўнік ФСБ Ігар Гіркін (Стралкоў) камандаваў штурмавікамі, якія ў красавіку 2014 года распачалі захоп Данбаса. У 2022-м ён замілавана вітаў напад Расіі на Украіну. Але ён стаў і адным з першых, што прызнаў, што бліцкрыг не ўдаўся. Летам 2022-га, калі расійскае грамадства яшчэ калыхалася ў шавіністычным чадзе, ён першы загаварыў аб слабасцях расійскай арміі і прадказаў наступ украінцаў. У 2024 спраўдзіўся яго прагноз пра тое, што стратэгічнага разгрому праціўніка не будзе і вайна захавае пазіцыйны характар з прасоўваннямі лакальнага значэння.
Гэтай вясной 54-гадовы Гіркін у лістах і праз адвакатаў прарочыць адступленне расійскіх войскаў. На яго думку, украінская армія назапасіла рэзервы, а расійская вычарпала свае магчымасці.
Атаку ўкраінскай арміі на Цёткіна (Курская вобласць) Гіркін лічыць разведкай боем і адцягваннем увагі.
«Вядома, праціўніку, які мае перавагу ў жывой сіле, выгадна як мага больш расцягнуць нашу лінію фронту, каб усе нашы магчымыя рэзервы былі ўцягнутыя ў ахову так званых «старых тэрыторый» Расійскай Федэрацыі. А наступаць яны будуць зусім у іншым месцы, са стратэгічнымі мэтамі. Не выключаю магчымасці нанясення там праціўнікам моцнай контратакі з вялікімі тэрытарыяльнымі стратамі для нашых войскаў», — піша Гіркін.
«Рэзервы праціўнік для гэтага назапасіў. Выкарыстоўваць асабовы склад як «мяса» праціўнік, як я разумею, развучыўся з 2023 года і дзейнічае больш пісьменна і асцярожна», — адзначае ён.
«У цэлым сітуацыя працягвае горшаць» — для расійскай арміі, мяркуе Гіркін.
«Наступны «накат» з боку УСУ павінен пачацца «вось-вось», — піша ён. — І ён (на гэты раз) будзе (хоць пакуль і не надта моцна) падтрыманы вайсковай сілай «кааліцыі» Брытаніі — Францыі — Італіі».
Гіркін бачыць тры найбольш імаверныя кірункі ўдараў Украіны:
-
Яшчэ адно ўварванне на «старыя тэрыторыі Расіі», у Курскай, Бранскай ці Белгарадскай абласцях, каб пакпіць з Крэмля.
-
Тактычнае (першапачаткова, а там — «як пойдзе») дэсантаванне на Крым або ўзбярэжжа паміж Крымам і вусцем Дняпра.
-
Наступ на Данецкім кірунку, дзе, па адчуванні Гіркіна, расійскія сілы моцна аслабленыя і змораныя шматмесячнымі баямі, выведзеныя на неўмацаваныя перадавыя пазіцыі і таму ўразлівыя для моцнай контратакі.
Гіркін прызнае, што разведінфармацыі ў яго няма і ён грунтуецца на інтуіцыі, «што я б зрабіў на іх месцы». Але ў чым ён упэўнены — расійская «сістэма татальнай хлусні… не дазваляе адэкватна ацаніць уласныя магчымасці для паспяховага вядзення ваенных дзеянняў».
Гіркін звяртае ўвагу, што «толькі Еўрасаюз мае паставіць Украіне сёлета 4 мільёны беспілотнікаў. Акрамя таго, уласная вытворчасць развіваецца ў самой Украіне».
«Еўропа можа вырабляць колькі заўгодна ўзбраення, колькі заўгодна электронікі, якую будзе пастаўляць супраць нас. І ў гэтай вайне ўсе эканамічныя магчымасці і перавагі на іх баку», — адзначае Гіркін у сваім апошнім допісе, 8 мая.
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары