Памятаеце палітвязня Вітухноўскага, які пайшоў ваяваць за Расію? Ён ужо загінуў
Хлопцу з Гомеля было 24 гады. Адразу пасля вызвалення ён прапаў. Спачатку казалі, што паехаў у манастыр, але ўрэшце Вітухноўскі знайшоўся на фронце — на баку акупантаў. Цяпер сябры Аляксандра паведамілі «Нашай Ніве» пра яго смерць.
Аляксандру Вітухноўскаму было 24 гады. Ён з Гомеля, вучыўся там жа — у Беларускім дзяржаўным універсітэце транспарту.
У сацыяльных сетках Вітухноўскі зусім нічога не пісаў пра палітыку. Ён публікаваў там выразкі з анімэ, фільмаў і гульняў, цытаты і мемы.
А вось члены яго сям'і актыўна дэманстравалі сваю палітычную пазіцыю. На старонцы ў маці — праваслаўныя іконы і згенераваныя ролікі, на якіх кагосьці віншуе Пуцін. У бацькі — відэа кшталту «Сербія падтрымала Расію». У брата — вялікі чырвона-зялёны сцяг і розныя прарасійскія падпіскі.
Аднак нават пры такіх сямейных уводных Вітухноўскі ў Беларусі трапіў у палітвязні.
Хлопца арыштавалі ў пачатку 2023 года. У кастрычніку 2023 яго асудзілі па двух артыкулах — «распальванне варожасці» (ч. 1 арт. 130 КК) і «ўдзел у дзеяннях, што груба парушаюць грамадскі парадак» (ч. 1 арт. 342 КК). Прысуд невядомы, але, па інфармацыі праваабаронцаў, ён усё ж трапіў у калонію — як мінімум на некалькі месяцаў.
Вітухноўскі выйшаў на свабоду ўвесну 2024 года. Праз месяц яго абвесцілі ў міліцэйскі вышук. Пра яго напісалі і пошукавыя атрады, паведаміўшы пра праблемы са здароўем у хлопца. У каментарах людзі паведамлялі, што бацькі ведаюць, дзе Аляксандр і што ён «паехаў у манастыр».
Манастыр аказаўся спецыфічны. Старонкі Вітухноўскага ў сацсетках не абнаўляліся да 24 лістапада 2024. Тады ён выклаў размытае фота расійскага вайскоўца. Тое, што вайсковец менавіта расійскі, відаць па форме.
Нядаўна ўкраінскі праект «Хачу жыць» выклаў спіс з больш за 700 беларусаў, якія ваююць супраць Украіны. У пераліку імёнаў ёсць і Аляксандр Вітухноўскі — паведамляецца, што ён падпісаў кантракт з расійскай арміяй 14 чэрвеня 2024 года.
Апошні раз гамяльчук быў анлайн 26 лістапада 2024 года.
У базе смерцяў грамадзян Беларусі, даступнай «Кіберпартызанам», Вітухноўскі яшчэ пазначаны жывым. Аднак там указваюцца звесткі па стане на канец 2024 года.
Як стала вядома «Нашай Ніве», Аляксандр Вітухноўскі загінуў у пачатку 2025 года. Гэтай інфармацыяй падзяліліся сябры былога палітвязня.
«Наша Нiва» — бастыён беларушчыны
ПАДТРЫМАЦЬЦяпер чытаюць
З'явілася яшчэ адно ФОТА Міколы Статкевіча пасля вызвалення2
Каментары