У французскіх Канах, дзе сёння закрываецца кінафестываль, адключылася электрычнасць
Электрычнасць сёння адключылася на поўдні краіны, гэта закранула і курортны горад.
Канскі кінафестываль паведаміў, што яго цырымонія закрыцця ў суботу ўвечары адбудзецца паводле плана, нягледзячы на маштабнае адключэнне электрычнасці, якое абясточыла Кан і рэгіён Марскія Альпы, пішаDeadline.
Цырымонія закрыцця Канскага фестывалю павінна пачацца ў 18:40 па мясцовым часе (19:40 па Мінску).
Крытыкі Deadline прадказваюць узнагароды для фільмаў «Сентыментальная каштоўнасць» Ёакіма Трыера, «Гэта быў проста няшчасны выпадак» Джафара Панахі і «Гук падзення» Машы Шылінскі.
Электрычнасць у Канах знікла прыкладна а 10 раніцы па мясцовым часе (11 па Мінску). Святло было адключана ў крамах і рэстаранах, якія маглі прымаць толькі наяўныя. Атрымліваць наяўныя было складана, бо банкаматы таксама не працавалі.
Святлафоры таксама не працавалі, што выклікала заторы на дарогах. Таксама быў закрануты інтэрнэт: папулярныя дадаткі, такія як WhatsApp, перыядычна не працавалі.
«Святло адключана па ўсіх Канах, але ў Палацы фестываляў святло ёсць. Усё працуе як звычайна, і ранішняя прэс-канферэнцыя з Келі Райхардт прайшла без праблем», — паведаміў Энтані Д’Алесандра з Deadline.
Радыё France Info паведаміла, што 160 000 дамоў у рэгіёне пацярпелі ад адключэння, якое было выклікана падзеннем лініі электраперадачы.
«Палац фестываляў пераключыўся на незалежную сістэму электразабеспячэння, што дазволіла ўсім запланаваным мерапрыемствам і паказам, уключаючы цырымонію закрыцця, прайсці паводле плана і ў звычайных умовах», — гаворыцца ў заяве фестывалю.
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары