Літоўскія памежнікі затрымалі семярых студэнтаў, якія паўзлі і каціліся з Беларусі ў бок мяжы ВІДЭА
У нядзелю ўдзень памежнікі ў Варэнскім раёне блізу Гродна праз сістэму відэаназірання зафіксавалі 7 нелегальных мігрантаў.
У Чапкельскім балотным масіве побач з мяжой з Беларуссю з-за нестабільнага грунту і прыродных перашкод немагчыма было ўсталяваць канцэрціну і ахоўны плот. Таму мяжу ў гэтым месцы памежнікі ахоўваюць іншымі спосабамі. Адзін з іх — сістэма назірання, у поле зроку якой трапляе кожны, хто зможа дабрацца да гэтага месца праз балота, паведамляе Памежная служба.
З тэрыторыі Беларусі 7 мігрантаў перасяклі мяжу паўзком і каціліся адзін за адным па зямлі. Яны лічылі, што так не будуць заўважаныя памежнікамі і не трапяць у камеры.
Аднак як толькі яны перайшлі мяжу і апынуліся ў Літве, у зарасніках у вільготным месцы балота іх адразу затрымалі супрацоўнікі Дзяржаўнай памежнай службы.
Шасцёра парушальнікаў назваліся грамадзянамі Гамбіі, адзін — Маўрытаніі. Яны збіваліся ў тлумачэннях і непаслядоўна сцвярджалі, што з'яўляюцца студэнтамі, якія нібыта вучацца ў навучальных установах Беларусі.
Ніводны з гэтых дарослых мужчын не меў дакументаў. Частая практыка сярод такіх асоб — пазбаўляцца дакументаў яшчэ на беларускай тэрыторыі, каб пры затрыманні ў Літве было цяжэй высветліць іх асобу і каб яны маглі даваць ілжывыя звесткі.
Памежная служба зазначае, што яны адпавядаюць тыповаму партрэту нелегальнага мігранта, які цяпер спрабуе прарвацца з Беларусі ў Літву: мужчына ва ўзросце каля 20—40 гадоў, фізічна моцны, здаровы. Ён не шукае дапамогі, Літва ці прытулак у ёй яго не цікавіць, мэта — нелегальна трапіць далей на Захад, найчасцей — у Германію.
Супрацоўнікі Дзяржаўнай памежнай службы правялі з затрыманымі звычайныя для такіх выпадкаў працэдуры. Гэтым разам патрэбы ў медыцынскай дапамозе не было — усе мігранты адчувалі сябе добра і былі падрыхтаваныя да спробы пранікнення.
Памежнікі таксама ацанілі вопратку і абутак затрыманых, ці патрэбна іх замяніць. Падраздзяленні Дзяржаўнай памежнай службы маюць запас такіх рэчаў і могуць, калі трэба, пераапрануць і пераабуць тых, каго вяртаюць.
Пасля індывідуальнай ацэнкі і пераканання, што замежнікам, якія паўзлі ў Літву, нічога не пагражае, было прынята рашэнне не ўпускаць іх у краіну ў адпаведнасці з заканадаўствам. Гэта было зроблена ў той жа дзень — у нядзелю.
Перад гэтым усім замежнікам літоўскія памежнікі прапанавалі гуманітарныя пакеты з ежай і іншымі рэчамі, прыдатнымі для знаходжання на адкрытым паветры. Паўзуны ад іх адмовіліся.
Цяпер чытаюць
Ціханоўская едзе ў Нью-Ёрк. Яна можа перасекчыся з прадстаўнікамі Лукашэнкі, але галоўную інтрыгу пакуль не раскрываюць27
Каментары