«У нас усе размаўляюць на рускай мове». Дзіцячы цэнтр не ўзяў на працу жанчыну, бо яна размаўляе па-беларуску
«Што, я павінна пераканаць кліентаў, што іх дзеці павінны слухаць заняткі на беларускай мове?»
У сацыяльных сетках актыўна абмяркоўваюць выпадак, які адбыўся з жанчынай, якая спрабавала працаўладкавацца ў дзіцячы цэнтр развіцця «Kids. Сокровища нации». У цэнтры ўдакладнілі, ці заўсёды кандыдатка размаўляе на беларускай. А калі атрымалі станоўчы адказ, параілі шукаць іншае месца працы, бо ў іх усе размаўляюць выключна на рускай.
«Kids. Сокровища нации» — гэта сетка цэнтраў развіцця для дзяцей і падлеткаў, якая працуе ў Мінску і Фаніпалі.
Чытачка «Нашай Нівы» патэлефанавала туды, каб даведацца, ці сапраўды адмова ад адной з дзяржаўных моў — гэта прынцыповая пазіцыя. Дырэктарка цэнтру Людміла Жук на пытанне адрэагавала вельмі эмацыйна.
«Я спытала чалавека, ці гатова яна выкладаць на рускай мове. Бо ёсць жа ў нас дзеці, якім годзік, два. Што, я скажу ім і бацькам: «А сёння наша настаўніца размаўляе толькі на беларускай»?! І мамы такія: «Дык а мы не размаўляем на беларускай у жыцці, нам бы на рускай дзяцей навучыць размаўляць!»
Людміла сцвярджае, што гатовая была прапанаваць беларускамоўнай кандыдатцы весці беларускамоўны гурток (зараз у цэнтры такога не існуе), але праз скандал у сацсетках ужо нічога не хоча. Але пры гэтым пацвярджае: яна сапраўды параіла жанчыне шукаць беларускамоўны дзіцячы цэнтр.
Дырэктарка вельмі раззлаваная тым, што яе рашэнне абмяркоўваюць у сацыяльных сетках. Яна кажа, што ёй тэлефануюць і пішуць розныя людзі, якія абураны сітуацыяй. Людміла Жук лічыць: як кіраўнік яна мае права абіраць, каго браць на працу. Кажа, што паважае беларускую мову, але не разумее, якое дачыненне адна з афіцыйных моў Беларусі мае да яе цэнтра.
Нагадаем, што артыкул 14 Працоўнага кодэкса забараняе дыскрымінацыю па мове.
«Што, я павінна пераканаць кліентаў, што іх дзеці павінны слухаць заняткі на беларускай мове? Напрыклад, у мяне гурток хуткачытання. Я кажу настаўніцы: «Выкладайце, калі ласка, на рускай». Калі яна адмаўляецца, я што, павінна канспекты на беларускую мову перакласці, ва ўпраўленні іх узгадніць, у дэпартаменце ўсюды сказаць, што ў мяне цяпер беларускамоўны цэнтр, бо нехта хоча выкладаць на беларускай?!
Людміла падкрэслівае: у яе ўсе дакументы на рускай мове, яе дзеці вучацца на рускай і ў цэнтры будзе руская.
«Я паважаю Беларусь, я ў ёй жыву, паважаю беларускую мову. Але ў нас вось так вось, усе пытанні вышэй туды задавайце. Ну да чаго хочаце мяне схіліць? Каб я пераклала назву цэнтра і зрабіла «Скарбы нацыі»? Не разумею, навошта гэтыя размовы».
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч14
Каментары
----------
Намёк на тое, што ўлада чужая, руская, дык і мова руская. Пытаньне беларусы русской власти задалі ў 2020-2021 гг., адказ пачулі.