Сяляне на вазах. Як маладым амерыканцам паказваюць Беларусь
У тыктоку публікуюць ролікі з дзіцячым магічным глобусам, які ў кароткім відэа распавядае пра кожную краіну свету. Вось што расказваецца пра Беларусь.
Тыктокер пад нікам nowheregrl88 здымае ролікі, у якіх націскае на краіны на дзіцячым «магічным глобусе» і паказвае, што распавядаецца пра іх у адпаведным кароткім відэа. Днямі ён апублікаваў ролік і пра Беларусь.
«Беларусь — пераважна раўнінная краіна ва Усходняй Еўропе, якая калісьці ўваходзіла ў склад Савецкага Саюза. Гэтая краіна размешчана паміж Расіяй, Польшчай, Украінай і Літвой. Бульба прысутнічае ў большасці тыповых беларускіх страў, такіх як дранікі, якія з'яўляюцца разнавіднасцю бульбяных аладак», — гаворыцца ў відэа дзіцячага глобуса.
Відэашэраг прыгнечвае: вяскоўцы вязуць гародніну і сена на вазах, запрэжаных коньмі, пасярод поля раскінулася нейкая сажалка, а ў канцы бабуля поле агарод. Не паказалі ніводнага горада, славутасці ці хаця б зуброў у Белавежскай пушчы.
У выпадку іншых краін глобус згадвае пра іх багатую гісторыю, культуру, архітэктуру, прыгожую прыроду, суправаджаючы карцінкай з турыстычных месцаў.
Пра Літву адзначаецца, што гэта краіна ў XIV-XVI стагоддзях была магутнай імперыяй, якая дамінавала над значнай часткай Усходняй Еўропы, а траціну роліка пра Польшчу займаюць кадры з Белавежскай пушчай і зубрамі. Беларусі не засталося нічога акрамя лапцяў, дранікаў і Савецкага Саюза.
Беларускія каментатары былі здзіўлены і абураны такой прэзентацыяй краіны. Беларусь — адна з самых урбанізаваных краін у свеце, згодна з данымі ААН, у краіне 76% насельніцтва пражывае ў гарадах, што супастаўна з узроўнем краін Заходняй Еўропы (79%) і больш, чым ва ўсіх суседзяў. А амаль двухмільённы Мінск па насельніцтве замыкае дзясятку найбуйнейшых гарадоў Еўропы, абыходзячы большасць еўрапейскіх сталіц — і пры гэтым Беларусь прэзентуецца для англамоўных дзяцей як адсталая сялянская краіна.
«Ага, мы ўсе жывём у вёсцы, наш любімы аўтамабіль — гэта трактар, але больш за ўсё нам падабаецца рабіць стаўкі на зуброў, хто хутчэй прабяжыць. А яшчэ мы ямо адну бульбу, таму што на ўсё астатняе ў нас алергія», — іранізуюць беларусы.
Многія палічылі, што прычына ў тым, што гэта проста старая цацка з часоў, калі пра Беларусь у свеце нічога не чулі, ці то з пачатку 2000-х, ці то ўвогуле 1980-х.
Насамрэч глобус даволі актуальны: на ім адлюстраваныя Чарнагорыя, якая здабыла незалежнасць у 2006 годзе, і Паўднёвы Судан, які стаў асобнай краінай у 2011 годзе. Цацка дагэтуль вырабляецца і яе свабодна можна набыць у інтэрнэце.
Вырабам Magic Adventures Globe займаецца кампанія LeapFrog Enterprises з Каліфорніі, якая спецыялізуюцца на навучальных цацак і электроніцы для дзяцей. Кампанія вядомая сваімі прадуктамі, якія дапамагаюць дзецям навучацца праз гульню: інтэрактыўныя кнігі, планшэты, алфавітныя гульні, і, як у гэтым выпадку, інтэрактыўныя глобусы з відэа.
Інтэрактыўны глобус з аловачкам-стылусам мусіў дапамагчы дзецям ва ўзросце ад 5 да 10 гадоў даведвацца пра краіны, культуры, жывёл і мовы.
Адукацыйныя відэа, якія выклікаюць столькі пытанняў, былі створаны для глобуса брытанскай карпарацыяй BBC. Відэа не датаваныя, аднак на падставе дэталяў з асобных ролікаў можна меркаваць, што яны былі створаны ў канцы 2000‑х — пачатку 2010‑х гадоў.
Напрыклад, у сюжэце пра Румынію на будынках ужо вісяць сцягі Еўрапейскага Саюза, у які краіна ўступіла ў 2007 годзе. У кадрах з Будапешта частка будынка парламента знаходзіцца ў рыштаваннях — рэстаўрацыя фасадаў, як вядома, працягвалася некалькі гадоў і завяршылася ў 2014 годзе.
Калі б відэа ні былі створаны, Беларусь ні ў познесавецкі час, ні ў часы незалежнасці не выглядала такім сельскім, адсталым «мядзведжым кутом», як паказвае амерыканскі «магічны глобус».
«Наша Нiва» — бастыён беларушчыны
ПАДТРЫМАЦЬДругі вайсковец, які загінуў пры аварыі МАЗа пад Асіповічамі — 21‑гадовы тэнісіст з Віцебска1
Каментары