Прэзідэнт ЗША Дональд Трамп падпісаў указ аб адмене эканамічных санкцый ЗША супраць Сірыі. Як заявілі ў Белым доме, гэта рашэнне з’яўляецца крокам на «шляху да стабільнасці і міру», піша Бі-бі-сі.
«ЗША прыхільныя падтрымцы стабільнай, адзінай і жывучай у міры з сабой і сваімі суседзямі Сірыі. Адзіная Сірыя, якая не дае прытулак тэрарыстычным арганізацыям і забяспечвае бяспеку сваіх рэлігійных і этнічных меншасцей, будзе падтрымліваць рэгіянальную бяспеку і росквіт», — гаворыцца ў указе.
Санкцыі супраць збеглага ў Расію былога прэзідэнта Сірыі Башара Асада, членаў яго сям’і і прыхільнікаў зрынутага рэжыму працягваюць дзейнічаць.
Трамп заявіў, што здыме санкцыі з Сірыі ў маі, перад тым як сустрэўся ў Эр-Рыядзе з новым сірыйскім лідарам Ахмедам аш-Шараа. Белы дом заявіў, што будзе сачыць за дзеяннямі новых уладаў Сірыі, уключаючы «прыняцце канкрэтных мер па нармалізацыі адносін з Ізраілем». Міністр замежных спраў Сірыі Асаад аль-Шыбані заявіў, што зняцце санкцый ліквідуе перашкоды на шляху аднаўлення сірыйскай эканомікі і адчыніць краіну для міжнароднай супольнасці.
У заяве міністра фінансаў ЗША Скота Бэсента гаворыцца, што ўказ аб зняцці санкцый дасць сірыйскаму народу «магчымасць пачаць жыццё нанова пасля звяржэння жорсткага рэжыму Асада».
«Сённяшнія дзеянні дапамогуць забяспечыць магчымасць уз’яднання эканомікі Сірыі з сусветным гандлем і аднаўлення інфраструктуры краіны», — заявіў ён.
Каментары