Беларускі верталёт Мі-24 збіў расійскі беспілотнік, які ляцеў ва Украіну
12 ліпеня верталёт Мі-24 ВПС Беларусі атакаваў і знішчыў расійскі ўдарны беспілотнік «Гербера», які ляцеў у бок Украіны.
Пра гэта hromadske паведаміла крыніца ў Галоўным упраўленні разведкі Міністэрства абароны Украіны.
Як адзначае суразмоўца, у гэты момант у паветранай прасторы Беларусі знаходзіліся як мінімум тры расійскія беспілотнікі.
Верталёт войскаў супрацьпаветранай абароны Беларусі падчас выканання задачы па кантролі паветранай прасторы паведаміў аб выяўленні і знішчэнні ўдарнага беспілотніка.
Паводле інфармацыі нашай крыніцы, абломкі збітага беспілотніка ўпалі ў Гомельскай вобласці.
Пра тое, што ў Гомельскім раёне ў ноч на 12 ліпеня быў збіты невядомы беспілотнік, паведамляў «Флагшток».
Рэшткі дрона ўпалі ў раёне Зябраўкі каля гадзіны ночы. Хто менавіта і якім спосабам збіў апарат — невядома.
Украінскія маніторынгавыя каналы перад гэтым не паведамлялі пра ўварванне дронаў у паветраную прастору Беларусі. Гэта магло сведчыць пра тое, што быў збіты малапрыкметны для ўкраінскіх радараў беспілотнік — напрыклад, расійская «Гербера».
За дзень да гэтага, позна ўвечары 11 ліпеня ў Рэчыцкім раёне беларускі знішчальнік спрабаваў збіць дрон, падобны да расійскага шахеда.
Людзі з розных раёнаў публікавалі таксама відэа з расійскімі дронамі, што заляцелі ў Беларусь.
«Гербера» — лёгкі, аднаразовы дрон-прыманка, прызначаны для перагрузкі сістэм ПРА і выяўлення пазіцый радарных комплексаў. Такі апарат можа быць абсталяваны і невялікай баявой часткай.
Цяпер чытаюць
Арыштавалі прадстаўнікоў кампаніі Bayer у Беларусі14
Каментары