Японцы з дапамогай 3D-друку пабудавалі дом з зямлі, а не бетону
Асноўнымі кампанентамі для будаўніцтва сталі глеба, вапна і прыродныя валокны. Пасля таго, як будынак адслужыць сваё, яго можна разабраць і вярнуць у прыроду без шкоды для навакольнага асяроддзя.
Як піша New Atlas, у японскай прэфектуры Кумамота, у горадзе Ямага, узведзены незвычайны дом, які атрымаў назву Lib Earth House Model B.
Гэта аднапавярховая пабудова плошчай 100 квадратных метраў, створаная з выкарыстаннем 3D-друку, але замест традыцыйнага бетону тут выкарыстаная земляная сумесь.
Праект рэалізаваны кампаніямі Lib Work Co., Arup і італьянскім стартапам WASP, які спецыялізуецца на тэхналогіях друку з натуральных матэрыялаў.
Як паведамляецца, асноўнымі кампанентамі для будаўніцтва сталі глеба, вапна і прыродныя валокны — даступныя, аднаўляльныя і экалагічна бяспечныя матэрыялы.
У Lib Work адзначаюць, што распрацавалі асаблівую тэхналогію змешвання, якая дазваляе дасягнуць трываласці і функцыянальнасці, неабходных для будаўнічых канструкцый. А галоўнае — пасля заканчэння тэрміну службы дом можна разабраць, а большую частку яго канструкцыі вярнуць у глебу, што значна скараціць колькасць адходаў.
Для ўзвядзення сцен выкарыстоўваўся 3D-прынтар ад WASP, які фармаваў сцены пластамі, паводле электроннай мадэлі. Пасля заканчэння друку рабочыя дадалі ашкляненне, дзверы, дах і іншыя неабходныя элементы, каб пераўтварыць канструкцыю ў паўнавартаснае жыллё.
Знешне дом выглядае сучасна і ўтульна: простыя формы, прасторныя памяшканні, шмат святла. Рыфленыя сцены і плоскі дах выдаюць тэхналогію 3D-друку, якая ляжыць у аснове праекта.
Дом не падключаны да гарадскіх камунікацый: ён працуе аўтаномна, дзякуючы сонечным панэлям і сістэме акамулятарных батарэй Tesla Powerwall. Усе інжынерныя сістэмы — ацяпленне, асвятленне, нават ванна — кіруюцца праз смартфон або спецыяльны пульт.
Унутры таксама ўсталяваныя датчыкі і сэнсары, якія дазваляюць аналізаваць узровень кандэнсацыі, цеплаізаляцыю і іншыя параметры, важныя для доўгатэрміновай эксплуатацыі.
Lib Work абвясціла, што з жніўня пачынае прымаць папярэднія заказы на Lib Earth House Model B. Кампанія марыць наладзіць вытворчасць да 10 000 такіх дамоў да 2040 года і цалкам аўтаматызаваць будаўніцтва, уключна з этапамі, якія пакуль выконваюцца людзьмі.
Пакуль што дамы даступныя толькі ў Японіі, але распрацоўшчыкі спадзяюцца, што ім зацікавяцца і ў іншых краінах. Праўда, кошт дома пакуль не называецца.
Цяпер чытаюць
Соф'я Сапега: Пратасевіч нагаварыў на мяне цэлы том крымінальнай справы6
Соф'я Сапега: Пратасевіч нагаварыў на мяне цэлы том крымінальнай справы
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары