Экспертная рада Расійскага ваенна-гістарычнага таварыства, якое ўзначальвае памочнік Пуціна Уладзімір Мядзінскі, вызначыла пераможцу конкурсу на найлепшы помнік маршалу Канстанціну Ракасоўскаму, які падораць беларускаму гораду. Перамог праект масквічкі.
Помнік двойчы Герою Савецкага Саюза будзе пастаўлены Расійскім ваенна-гістарычным таварыствам у гарадскім скверы на рагу Савецкай вуліцы і плошчы Паўстання, побач з якім традыцыйна праводзіцца вайсковы парад з нагоды Дня Перамогі.
Па выніках галасавання ў конкурсе на найлепшы архітэктурна-мастацкі праект помніка Ракасоўскаму перамог праект Юліі Пашынай.
«Наша Ніва» адшукала патэнцыйную аўтарку помніка. Яна нарадзілася ў 1989 годзе ў гарадку Кулябакі Ніжагародскай вобласці Расіі, скончыла ў 2011 годзе Абрамцаўскі мастацка-прамысловы каледж імя В. М. Васняцова па спецыяльнасці «кераміка», а пасля — факультэт скульптуры Расійскай акадэміі жывапісу, скульптуры і дойлідства ў Маскве, дзе жыве і цяпер.
Помнік адлюстроўвае вобраз Ракасоўскага ў момант камандавання Парадам Перамогі 1945 года. Маршал паказаны ў параднай форме, верхам на ўзнятым на дыбкі кані. Пастамент выкананы ў выглядзе брукаванкі Краснай плошчы і змяшчае два сюжэтныя рэльефы: з аднаго боку — карта Гомельска-Рэчыцкай наступальнай аперацыі пад камандаваннем Ракасоўскага, у выніку якой быў вызвалены Гомель; з іншага боку — складзеныя сцягі разбітых нямецкіх часцей. У правай руцэ вершнік трымае маршальскую шаблю, вастрыём якой ён паказвае на сцягі разбітага ворага — што сімвалізуе поўную капітуляцыю праціўніка.
У маі 2025 года на месцы будучага помніка быў адкрыты закладны камень. Помнік плануецца стварыць да 82-й гадавіны вызвалення Гомеля ад нямецкіх захопнікаў, якая будзе адзначацца 26 лістапада 2025 года.
Раней Расійскае ваенна-гістарычнае таварыства паставіла помнікі Канстанціну Ракасоўскаму ў Маскве, Валгаградзе і Улан-Удэ.
Старшынёй Расійскага ваенна-гістарычнага таварыства з'яўляецца Уладзімір Мядзінскі, памочнік Пуціна, раней вядомы сваёй роллю ў прапагандысцкай дзейнасці Крамля, а цяпер у якасці кіраўніка расійскай дэлегацыі на перамовах з Украінай. У сакавіку гэтага года ён прыязджаў у Мінск, каб узяць удзел у адкрыцці новага помніка салдатам Расійскай імператарскай арміі, якія загінулі падчас Першай сусветнай вайны. Помнік з выявай імперскага арла быў устаноўлены за кошт Расійскага ваенна-гістарычнага таварыства.
Акрамя помніка маршалу Ракасоўскаму, Мядзінскі мае намер паставіць у Гомелі помнік расійскаму фельдмаршалу Івану Паскевічу, душыцелю паўстання 1830—1831 гадоў.
Каментары