Прэзідэнт ЗША Дональд Трамп абвясціў пра намер істотна павысіць мытныя пошліны на тавары з Індыі. Паводле яго слоў, прычынай стала тое, што Індыя працягвае купляць расійскую нафту і нават перапрадае яе на сусветным рынку з прыбыткам. Ён адзначыў, што такім чынам Індыя ўскосна падтрымлівае канфлікт ва Украіне.
«Індыя не толькі купляе велізарныя аб'ёмы расійскай нафты, але таксама для значнай часткі набытай нафты прадае яе на адкрытым рынку з вялікім прыбыткам. […] Праз гэта я істотна павялічу тарыф, які Індыя плаціць ЗША», — напісаў Дональд Трамп у сацыяльнай сетцы Truth Social, дадаўшы, што Індыю не хвалюе колькасць загінулых ва Украіне.
У канцы ліпеня Трамп абвясціў пра планы ўвесці 25-працэнтныя пошліны на індыйскія тавары і магчымыя санкцыі за закупку расійскіх энергарэсурсаў і ўзбраення. Індыйскі бок адказаў, што гатовы да далейшых перамоў, але будзе адстойваць свае эканамічныя інтарэсы.
З 1 жніўня ў ЗША пачала дзейнічаць новая тарыфная сістэма, устаноўленая адміністрацыяй Трампа. Яна закранае пастаўкі з 69 краін і прадугледжвае пошліны ад 10% да 41%. Для Індыі пакуль дзейнічае сярэдні ўзровень — 25%.
2 жніўня Трамп заявіў, што ЗША атрымалі сігналы пра магчымае спыненне Індыяй закупак расійскай нафты. Аднак, паводле інфармацыі Bloomberg, урад Індыі не выдаваў ніякіх афіцыйных інструкцый на гэты конт. Індыйскія нафтавыя кампаніі самастойна вырашаюць, у каго закупаць сыравіну, зыходзячы з камерцыйных інтарэсаў.
Індыя — трэці найбуйнейшы спажывец нафты ў свеце і значную яе частку імпартуе. На расійскую нафту прыпадае каля 35—40% усяго імпарту нафты ў краіну. Танныя пастаўкі з Расіі дапамагаюць Індыі змяншаць выдаткі, стрымліваць рост цэнаў і інфляцыю.
Міністр нафты і газу Індыі Хардып Сінгх Пуры у інтэрв'ю расійскаму агенцтву ТАСС адзначаў, што энергетычнае партнёрства з Расіяй застаецца моцным і працягвае развівацца, нягледзячы на глабальную нестабільнасць.
Цяпер чытаюць
Беларусы горача спрачаюцца, ці варта прывязваць дапамогу на дзіця да заробку маці3
Каментары