У ДАІ адказалі, ці будуць уводзіць дзяржаўную рэгістрацыю электрасамакатаў
У сувязі з падпісаннем Лукашэнкам 5 жніўня ўказа, які абмяжоўвае хуткасць электрасамакатаў, сярод іншага ўзнікла пытанне, ці плануецца ўводзіць дзяржаўную рэгістрацыю для сродкаў персанальнай мабільнасці (такіх як электрасамакаты, монаколы і г. д.). На яго на прэс-канферэнцыі адказаў Начальнік галоўнага ўпраўлення Дзяржаўтаінспекцыі МУС Беларусі Віктар Ротчанкаў, піша БелТА.
Паводле слоў міліцэйскага чыноўніка, на гэты момант у ГАІ гэтае пытанне не лічаць актуальным. Але калі такіх прылад у Беларусі стане значна больш і ўзрасце інтэнсіўнасць іх руху, то тады могуць пачаць працаваць над увядзеннем рэгістрацыі або іншых знакаў адрознення.
Нагадаем, што згодна з указам №295, падпісаным Лукашэнкам 5 жніўня, перагледжаныя правілы карыстання персанальнымі мабільнымі сродкамі — электрасамакатамі, сегвэямі, монаколамі. Удакладнена, што да іх адносяцца прылады з электраматорам і максімальнай хуткасцю да 25 км/г.
Для іх усіх уводзяцца хуткасныя абмежаванні: не больш за 25 км/г на веласцежках і 10 км/г на тратуарах. Забараняецца ездзіць па тратуарах на цяжкіх прыладах, маса якіх перавышае 35 кг.
Гэтыя змены ў ПДР набываюць моц з 1 верасня.
Прапаганда рыхтуе грамадства да загадкавай «працяглай камандзіроўкі» Лукашэнкі39
Каментары