Казахстанскі «Кайрат» з двума беларусамі прабіўся ў асноўны раўнд Лігі чэмпіёнаў
У матчы плэй-оф кваліфікацыі клуб з Алматы па суме двух матчаў адолеў шатландскі «Сэлтык».
Тыдзень таму матч у Глазга скончыўся з лікам 0:0. Учора ў Алматы асноўны і дадатковы час таксама завяршыўся 0:0.
І ўсё вырашылася ў серыі пенальці, дзе галкіпер «Кайрата» 21-гадовы Тэмірлан Анарбекаў адбіў тры пенальці з пяці.
За казахстанскі клуб выступае двое беларусаў: капітан клуба Аляксандр Мартыновіч і Валер Грамыка. Грамыка ў серыі 11-метровых прабіў у перакладзіну, а Мартыновіч не схібіў.
А Мартыновіч, якому ўчора споўнілася 38, пасля матча пажартаваў: «Так, мабыць, гэта найлепшы падарунак на дзень нараджэння! Уся каманда — малайцы. Змагаліся на працягу абодвух паядынкаў і заслужылі выхад у наступны раўнд. У серыі пенальці таксама атрымалася, як і задумалі. Хай Валера Грамыка і ўдарыў у перакладзіну, але трапіў у яе ўпэўнена!»
Апошнія чатыры ўдзельнікі Лігі чэмпіёнаў вызначацца сёння, а ў чацвер пройдзе лёсаванне асноўнай стадыі. Як і год таму, яно адбудзецца па новай сістэме, без звыклага падзелу на групы, а кожны клуб атрымае па восем супернікаў.
У кваліфікацыі Лігі чэмпіёнаў брала ўдзел мінскае «Дынама», якое вылецела ў другім раўндзе, прайграўшы балгарскаму «Лудагорцу», а потым і з Лігі канферэнцый, двойчы саступіўшы албанскай «Эгнаціі».
У еўракубках застаўся толькі «Нёман». Заўтра ў плэй-оф кваліфікацыі Лігі канферэнцый гарадзенцы згуляюць з іспанскай «Рая Вальекана» (першы матч 0:1 на карысць іспанцаў).
Цяпер чытаюць
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых1919
Каментары